ہالی ووڈ کے سپر اسٹار ٹام کروز رواں ماہ امارات آ رہے ہیں جہاں وہ ابوظہبی میں اپنی مشہور فرنچائز فلم مشن امپوسیبل سیریز کی نئی فلم ’’مشن امپوسیبل ڈیڈ رینکنگ پارٹ ون‘‘ کے پریمیئر میں شرکت کریں گے۔
عرب نیوز کے مطابق یو اے ای فلم مشن امپوسیبل ڈیڈ ریکیننگ پارٹ ون کا مشرق وسطی کا پریمیئر منعقد کرنے کے لیے تیار ہے جہاں ابو ظبی کے ایمریٹس پیلس میں 26 جون کو فلم کا ریڈ کارپٹ ایونٹ منعقد کیا جائے گا۔ فلم کے پریمیئر میں ٹام کروز اور ہدایت کار کرسٹوفر میک کوئری شرکت کریں گے۔
اس فلم کے کچھ سین متحدہ عرب امارات کے دارالحکومت ابو ظبی کے لیوا صحرا اور ایئرپورٹ کے مڈ فیلڈ ٹرمینل میں شُوٹ کیے گئے ہیں اور ٹام کروز، کاسٹ اور عملے نے 2021 میں امارات میں دو ہفتے ابو ظبی فلم کمیشن اور مقامی پروڈکشن پارٹنرز کی معاونت کے ساتھ شوٹنگ کی۔
یہ دوسری مرتبہ ہو رہا ہے کہ پیراماؤنٹ پکچرز کی فرنچائز نے ابو ظہبی میں فلم کی شوٹنگ کی ہے۔ اس سے قبل 2018 میں مِشن امپوسیبل فال آؤٹ کا ہالو جمپ سیکوئنس بھی ابو ظبی میں شوٹ ہوا تھا۔
کریٹیو میڈیا اتھارٹی کے ایکٹنگ ڈائریکٹر جنرل خلفان المضروئی کہتے ہیں کہ ’مشن امپوسیبل ڈیڈ ریکیننگ پارٹ ون کے پریمیئر کی میزبانی کرنا ابو ظبی کے لیے اعزاز کی بات ہے.
واضح رہے کہ ایکشن اور تھرل سے بھرپور مشن امپوسیبل ڈیڈ ریکیننگ پارٹ ون رواں برس 12 جولائی کو دنیا بھر کے سنیما گھروں میں نمائش کے لیے پیش کی جائے گی۔