اسلام آباد: حکومت نے آئندہ 15 روز کے لیے پیٹرولیم مصنوعات کی قیمتیں برقرار رکھنے کا اعلان کیا ہے۔
اے آر وائی نیوز کے مطابق وزیر خزانہ اسحاق ڈار کا کہنا ہے کہ پیٹرول اور ڈیزل کی قیمتوں میں کوئی ردوبدل نہیں کیا جارہا، ملک میں یکم جون والی پیٹرول اور ڈیزل کی قیمتیں برقرار رہیں گی۔
انہوں نے بتایا کہ عالمی منڈی میں گیس اور تیل کی قیمتوں میں تھوڑا سا اضافہ ہوا ہے اور آج کئی اخبارات نے رپورٹ کیا کہ ڈیزل کی قیمت میں ساڑھے 3 روپے کا اضافہ اور پیٹرول کی قیمت میں چند پیسوں کی کمی ہو گی، میں حیران ہوں کہ میڈیا کو پتہ نہیں یہ خبریں کیسے ملیں۔
اسحاق ڈار کا کہنا تھا اوگرا نے جو تجاویز دیں اس کے مطابق ڈیزل اور پیٹرول کی قیمتیں برقرار رکھنے کا فیصلہ کیا گیا، جو آج کے اخبارات میں اضافہ رپورٹ ہوا تھا وہ اضافہ نہیں ہے۔
یاد رہے 31 مئی کو وفاقی حکومت کی جانب سے پیٹرولیم مصنوعات کی قیمتوں میں رد و بدل کا اعلان کیا گیا تھا۔
وزیر خزانہ اسحاق ڈار نے نیوز کانفرنس کرتے ہوئے بتایا تھا کہ عالمی منڈی میں تیل کی قیمتوں میں بڑی تبدیلی نہیں آئی لہٰذا پیٹرول کی قیمت میں 8 روپے فی لیٹر کمی کر کے نئی قیمت 262 روپے کر دی۔
انہوں نے بتایا تھا کہ ڈیزل کی قیمت میں فی لیٹر 5 روپے کمی کی جا رہی ہے جس کے بعد اس کی نئی قیمت 258 سے کم ہو کر 253 روپے فی لیٹر ہوگی۔
اسحاق ڈار کا کہنا تھا کہ لائٹ ڈیزل کی قیمت میں بھی 5 روپے فی لیٹر کمی کر رہے ہیں، اس کی نئی قیمت 152 سے کم ہو کر 147 روپے فی لیٹر ہوگی۔