ممبئی: بالی وڈ کی معروف اداکارہ امیشا پٹیل کے خلاف فلم پروڈیوسر کی جانب سے دائر کیے گئے ایک فراڈ کیس میں اہم پیشرفت سامنے آگئی۔
بھارتی میڈیا کے مطابق امیشا پٹیل نے رانچی سول کورٹ کے سامنے سرینڈر کر دیا جبکہ سینئر ڈویژن جج ڈی این شکلا نے ضمانت منظور کرتے ہوئے ادکاارہ کو 21 جون کو دوبارہ ذاتی حیثیت میں عدالت میں پیش ہونے کا حکم جاری کر دیا۔
فلم پروڈیوسر اجے کمار سنگھ نے سال 2018 میں امیشا پٹیل کے خلاف فراڈ اور چیک باؤنس کا مقدمہ درج کروایا تھا۔
متعلقہ: عمران عباس کا امیشا پٹیل کیلیے خصوصی پیغام وائرل ہوگیا
اجے کمار سنگھ کے وکیل کے مطابق ’اس سے قبل عدالت نے کیس میں کئی بار اداکارہ کو حاضری کے سمن جاری کیے تھے لیکن وہ پیش نہ ہوئیں، بعد ازاں ان کے وارنٹ جاری کیے گئے تھے۔‘
دراصل فلم پروڈیوسر نے فلم ’دیسی میجک‘ کیلیے امیشا پٹیل کے بینک اکاؤنٹ میں ڈھائی کروڑ روپے ٹرانسفر کیے تاہم بعد میں اداکارہ نے فلم کرنے سے انکار کر دیا اور اجے کمار سنگھ کو رقم لوٹانے کیلیے ڈھائی کروڑ روپے کا چیک دیا جو باؤنس ہوگیا۔
اگست 2022 میں سپریم کورٹ نے امیشا پٹیل کے خلاف فوجداری کارروائی کو روکنے کا حکم جاری کیا جس کیلیے ریاست جھارکھنڈ کی ٹرائل کورٹ نے سمن جاری کیا تھا۔