ڈیری فارمرز نے دودھ کی قیمتوں میں ایک بار پھر ‘‘ہوشربا اضافے’’ کی تیاری کرلی

اتظامیہ، ڈیری فارمر ایسوسی ایشن کے مابین دودھ کی قیمتوں کے تعین کے لیے ہونے والا اجلاس بے نتیجہ ختم ہو گیا، ڈیری فارمرز نے دودھ کی نئی قیمت 280 روپے فی لیٹر مقرر کرنے کی درخواست کر دی۔

اے آر وائی نیوز کے مطابق انتظامیہ اور ڈیری فارمر ایسوسی ایشن کے درمیان دودھ کی قیمتوں کے تعین کے سلسلے میں ہونے والا اجلاس بے نتیجہ ختم ہوگیا، کمشنر اپنی مصروفیات کی وجہ سے اجلاس میں شریک نہ ہوسکے۔

ایڈیشنل ڈپٹی کمشنر اورڈیری فارمرایسوسی ایشن کے درمیان قیمتوں پر معاملات طے نہ پا سکے۔ ڈیری فارمرایسوسی ایشن کی جانب سے اجلاس میں انتظامیہ کے سامنے اپنا موقف بیان کرتے ہوئے کہا کہ دودھ کی پیداواری لاگت 242 روپے فی لیٹر ہو گئی ہے۔

ڈیری ایسوسی ایشن نے پیداواری لاگت میں اضافے کی وجہ سے دودھ 280 روپے فی لیٹر مقرر کرنے کی درخواست کی، انتظامیہ کی جانب سے شاکر عمر گجر نے بتایا کہ کمشنر کراچی کی عدم موجودگی کے باعث اجلاس کو بغیر کسی فیصلے کے ملتوی کر دیا گیا ہے۔