مسلم لیگ (ن) کی چیف آرگنائزر مریم نواز کا کہنا ہے کہ معاشی بحالی کا قومی منصوبہ تاریخی قدم ہے، ایٹمی دھماکوں کی طرح معاشی بحالی کا منصوبہ پاکستان کو معاشی قوت بنائے گا۔
(ن) لیگ کی سینئر نائب صدر مریم نواز سے سابق وزیر اعلیٰ بلوچستان جام کمال خان، رکن قومی اسمبلی ملک سہیل اور سابق ایم پی اے اختیار ولی نے ملاقات کی۔ ملاقات میں پارٹی تنظیمی امور اور مستقبل کی سیاسی حکمت عملی پر تبادلہ خیال کیا گیا۔
اس دوران گفتگو کرتے ہوئے مریم نواز کا کہنا تھا کہ پاکستان بالخصوص بلوچستان کی ترقی نواز شریف کے دل کی آواز ہے، بلوچستان کی ترقی میں عوام کو شراکت دار بنانا چاہتے ہیں، صوبے میں احساس محرومی دور کرنے کیلیے ٹھوس اقدامات پر کاربند ہیں۔
مریم نواز نے کہا کہ وزیر اعظم دانش اسکول اور ووکیشنل درس گاہ کے قیام کے اقدامات کیے ہیں، وزیر اعظم شہباز شریف نے 1150 ارب روپے کا ترقیاتی بجٹ دیا ہے۔
انہوں نے کہا کہ معاشی استحکام، غربت، بے روزگاری اور مہنگائی کا خاتمہ اولین ترجیح ہے۔
ملاقات میں ان کا یہ بھی کہنا تھا کہ پارٹی کے نظریاتی، وفادار، محنتی رہنماؤں اور کارکنوں کی قدر کرتے ہیں، وقت کی آندھیوں میں ثابت قدم رہنے والے پارٹی کے سر کا تاج ہیں، انتخابات میں پارٹی کے نظریاتی رہنماؤں اور کارکنوں کو ٹکٹ دیں گے۔
اس سے قبل مریم نواز نے اپنے ایک بیان میں الیکشن سے متعلق کہا تھا کہ الیکشن میں پارٹی ایک مؤثر پارلیمانی قوت بن کر ابھرے گی، پارٹی کارکنان عوامی رابطہ مہم شروع کر دیں۔
ان کا کہنا تھا کہ آئندہ الیکشن کیلیے تیار ہیں اور تیاری کے ساتھ میدان میں اتریں گے، انتخابات میں مسلم لیگ (ن) دو تہائی اکثریت حاصل کرے گی۔