پیرس : وزیراعظم شہباز شریف نے آئی ایم ایف کی منیجنگ ڈائریکٹر کرسٹلینا جورجیوا سے پیرس میں ملاقات کی اس موقع پر پاکستان کے کیے قرض پروگرام سے متعلق اہم امور زیر غور آئے۔
تفصیلات کے مطابق وزیراعظم شہباز شریف کی آئی ایم ایف کی منیجنگ ڈائریکٹر سے ملاقات لندن روانگی سے قبل مجموعی طور پر تین بار ہوئی۔
اس موقع پرم وزیراعظم نے آئی ایم ایف کے ساتھ پروگرام کو مکمل کرنے کے پاکستان کے عزم کو دہرایا، پاکستان کی معاشی حقیقت سے متعلق غور کرنے پر وزیراعظم نے ایم ڈی آئی ایم ایف کی سوچ کو سراہا۔
شہبازشریف نے کہا کہ پاکستان اپنے تمام وعدوں کو پورا کرنے کا جذبہ اور پورا عزم رکھتا ہے، پاکستان کو شدید معاشی چیلنجز سے نکلنے میں دنیا کی معاونت کی قدر کرتے ہیں۔
انہوں نے کہا کہ سیلاب نے معاشی مشکلات کو مشکل بنایا لیکن پاکستان نے اپنے عوام کو ریلیف دیا، پاکستانی عوام کو ریلیف ملنا ان کا حق ہے، معاشی مشکلات نے عوام کو بہت زیادہ تکلیف میں مبتلا کیا جو ان کی برداشت سے باہر ہے۔
وزیر اعظم کا کہنا تھا کہ عوام کے ریلیف اور معاشی حقائق کے درمیان توازن چاہتے ہیں، معیشت کو واپس گروتھ کے راستے پر لانا آئی ایم ایف اہداف کے حصول کے لئے ضروری ہے، گزشتہ4سال کی معاشی بدحالی کی بحالی کے لئے ناگزیر اقدامات کرناہوں گے۔
شہباز شریف نے کہا کہ معاشی بحالی سے آئی ایم ایف اہداف کو بہتر طور پر حاصل کیا جا سکتا ہے، پاکستان ہمیشہ کی طرح عالمی برداری کے ساتھ اپنے عزم، وعدوں کی تکمیل پر پورا اترتا رہے گا، آئی ایم ایف کی منیجنگ ڈائریکٹر نے وزیراعظم شہباز شریف کے پاکستان کے لئے عزم کو سراہا۔