شدید گرمی میں ملک کو کتنے ہزار میگا واٹ بجلی کی کمی کا سامنا ہے؟

ملک میں بجلی کا مجموعی شارٹ فال 6 ہزار 301 میگاواٹ ہو گیا، بجلی کی مجموعی پیداوار 22 ہزار200 میگاواٹ جب کہ طلب 28 ہزار 801 میگاواٹ تک پہنچ چکی ہے، ملک بھر میں 8 سے 10 گھنٹے کی لوڈ شیڈنگ بھی جاری ہے.

اے آر وائی نیوز کے مطابق ذرائع پاور ڈویژن نے بتایا ہے کہ اس وقت پاکستان میں بجلی کا مجموعی شارٹ فال 6 ہزار 301 میگاواٹ تک پہنچ چکا ہے، بجلی کی مجموعی پیداوار 22 ہزار200 میگاواٹ ہے لیکن ملک بھر میں بجلی کی طلب بڑھ کر 28 ہزار 801 میگاواٹ ہو گئی ہے۔

ذرائع پاور ڈویژن کا کہنا ہے کہ ملک بھر میں 8 سے 10 گھنٹے تک کی لوڈ شیڈنگ کی جا رہی ہے، گرمی کی شدت کی وجہ سے بجلی کی طلب میں اضافہ ہو گیا ہے۔

وزرات توانائی ڈویژن کے مطابق ملک میں پن بجلی کی پیداوار6 ہزار 598 میگاواٹ ہے، سرکاری تھرمل پاور پلانٹس 935 میگاواٹ بجلی پیدا کر رہے ہیں، نجی شعبے کے بجلی گھروں کی پیداوار 10 ہزار 503 میگاواٹ ہے۔

اس وقت ونڈ پاور پلانٹس سے جو بجلی حاصل کی جارہی ہے اس کی مقدار ایک ہزار23 میگاواٹ ہے، سولر بجلی گھروں کی پیداوار 121 میگا واٹ بتائی جاتی ہے، بگاس سے 156 میگاواٹ بجلی پیدا کی جا رہی ہے جب کہ نیوکلیئر پاور پلانٹس کی پیداوار3 ہزار164 میگاواٹ ہے۔