اللہ تعالیٰ کی آخری کتاب قرآن کریم کو مصر کی ایک مسجد میں دیواروں پر کندہ کیا گیا ہے جس نے سیاحوں کی توجہ اپنی جانب مبذول کرا لی ہے۔
قرآن کریم مکمل طور پر حفاظ کرام جب کہ سورتوں اور آیات کی صورت میں ہر مسلمان کے دل میں محفوظ ہے۔ اپنی آفاقی تعلیمات کے باعث یہ الہامی کتاب غیر مسلموں کی توجہ کا مرکز بھی رہتی ہے۔ مصر میں ایک نئی مسجد میں کچھ منفرد انداز میں اس قرآن پاک کو محفوظ کیا گیا ہے جس نے پوری دنیا کے سیاحوں کی توجہ اپنی جانب مبذول کرالی ہے۔
گزشتہ دنوں سوشل میڈیا پر ایک ویڈیو تیزی سے وائرل ہوئی جس کے کیپشن میں بتایا گیا ازبکستان کے شہر بخارا میں دنیا کا واحد قرآنی مصحف جو دیواروں میں کندہ ہے۔ 30 پاروں کیلئے 30 الگ الگ کمرے ہیں جن کی دیواروں پر خوبصورت خط نسخ میں قرآن کریم کندہ کیا گیا ہے۔ اس ویڈیو کو دیکھ کر ہر مسلم دل مسرور ہوا لیکن اس کی حقیقت کچھ اور ہے۔
قرآن کریم خوبصورت خطاطی میں دیواروں پر مصحف ضرور کیا گیا ہے لیکن یہ ازبکستان کے شہر بخارا کی مسجد نہیں بلکہ مصر کی ایک نئی مگر عظیم الشان مسجد ہے جس کو قاہرہ کے نئے انتطامی دارالحکومت ( العاصمة الإدارية الجديدة) نامی علاقے میں تعمیر کیا گیا ہے۔
یہ صرف مسجد ہی نہیں بلکہ فن تعمیر کا عظیم نمونہ ہے۔ اس کا سرکاری نام تو اسلامی ثقافتی مرکز ہے مگر یہ ملک اور بیرون ملک ’مصر مسجد‘ کے نام جانی جاتی ہے۔ یہ مسجد مجموعی طور پر 19 ہزار مربع گز پر قائم ہے جس میں بیک وقت ایک لاکھ سے زائد افراد نماز ادا کر سکتے ہیں۔ اس میں گاڑیاں کھڑی کرنے کے لیے کئی منزلہ پارکنگ ہے جہاں 4 ہزار کاریں سما سکتی ہیں۔
اسی عالیشان مسجد میں دیواروں پر مکمل قرآن کریم خط نسخ میں کندہ کیا گیا ہے جس کو ورلڈ گنیز بُک آف ورلڈ ریکارڈ میں درج کرالیا گیا ہے۔
مقامی میڈیا کے مطابق مسجد میں قرآن پاک کندہ کرنے کے 30 خصوصی گلیریز مختص کی گئیں جہاں ہر گیلری میں ایک پارہ کندہ کیا گیا۔ پہلی گیلری میں دیوار پر کندہ قرآن پاک کا آغاز پہلی سورت سورہ فاتحہ سے ہوتا ہے جب کہ 30 ویں گیلری میں اس کا اختتام آخری سورت سورہ الناس پر ہوتا ہے جس کے بعد ختم قرآن کی دعا بھی کندہ ہے۔
رواں برس رمضان المبارک کے آغاز پر یکم رمضان کو مصر کے صدر عبدالفتح السیسی نے اس کا افتتاح کیا تھا۔
اس مسجد کو دیوار پر پورا قرآن کریم کندہ ہونے کے باعث دنیا میں انفرادیت حاصل ہوچکی ہے اور عالمی ریکارڈ بھی قائم ہوچکا ہے، لیکن اس سے قبل بھی اس کے پاس دو عالمی اعزازات ہیں جو گنیز بک آف ورلڈ ریکارڈ میں درج ہیں۔
ایک عالمی اعزاز تو اس میں لکڑی سے بنا منبر ہے جو دنیا میں کسی بھی مسجد میں سے سے اونچا اور مکمل طور پر ہاتھ سے بنایا گیا منبر ہے جس کی اونچائی 16.6 میٹر یعنی 54 فٹ ہے۔
اس کے ساتھ ہی اس مسجد میں دنیا کا سب سے بڑا فانوس آویزاں ہے جس کا وزن 50 ٹن ہے۔ اس کا قطر 22 میٹر پر پھیلا ہے اور اس کی اونچائی چار منزلہ ہے۔