ریاض: سعودی عرب میں سوشل پروفیشن پرمٹ فیس اب 400 ریال ہوگی۔
تفصیلات کے مطابق وزارت افرادی قوت و سماجی بہبود نے کہا ہے کہ نئے قانون کے تحت سوشل پروفیشن پرمٹ فیس چار سو ریال ہوگی، جب کہ سوشل پروفیشن پرمٹ کے منظور شدہ سوشل پروفیشن کے لیے درکار تعلیمی قابلیت کو پورا کرنا اور تحریری امتحان دینا ہوگا، جس کی فیس 150 ریال ہے اور انٹرویو فیس 100 ریال ہوگی۔
پرمٹ کے اجرا کی فیس 150 ریال، پرمٹ میں توسیع کی فیس 150 ریال، اور زائد المیعاد پرمٹ کی توسیع کی فیس 300 ریال ہوگی۔
عکاظ اخبار کے مطابق سوشل پروفیشن سے مراد ماہر نفسیات، ذہنی معالج اور سماجی امور کے گائیڈ ہیں۔ سعودی عرب میں سماجی امور کے ماہر کی اوسط تنخواہ 10700 ریال سے 36100 ریال کے درمیان ہے جب کہ اوسط تنخواہ 22800 ریال مل رہی ہے۔
وزارت سماجی بہبود کے مطابق سماجی پیشوں کے لیے بنائے گئے نئے قانون کا مقصد یہ ہے کہ ان پیشوں کا معیار بہتر بنایا جائے، اور انھیں جدید خطوط پر استوار کیا جائے۔