اسلام آباد: ادارہ شماریات نے بڑی صعنتوں کی پیداوار کے اعداد و شمار جاری کر دیے جن کے مطابق گزشتہ مالی سال 2022-23 کے پہلے 11 ماہ ان کی پیداوار کو دھچکا لگا۔
ادارہ شماریات کے اعداد و شمار کے مطابق جولائی تا مئی بڑی صنعتوں کی پیداوار میں 9.87 فیصد کی کمی ریکارڈ ہوئی جبکہ مئی میں سالانہ بنیادوں پر بڑی صنعتوں کی پیدوار میں 14.37 فیصد کی بڑی کمی ہوئی۔
اعداد و شمار کے مطابق مئی میں ماہانہ بنیادوں پر بڑی صنعتوں کی پیداوار میں 5.88 فیصد اضافہ ہوا، جولائی تا مئی فوڈ 7.54 اور مشروبات شعبے کی پیداوار میں 4.13 فیصد کی کمی ریکارڈ کی گئی۔
ادارہ شماریات کا کہنا ہے کہ تمباکو 27.08 اور ٹیکسٹائل شعبے کی پیداوار 18.58 فیصد گر گئی، لکڑی کی مصنوعات کی پیداوار میں 62.05 فیصد کی کمی ہوئی، پیپر اور بورڈ کی صنعتوں کی پیداوار میں 6.92 فیصد کمی ہوئی۔
اسی طرح کیمیکلز 7.20 اور فرٹیلائزر شعبے کی پیداوار میں 9.24 فیصد کمی ہوئی، فارماسوٹیکلز شعبے کی پیداوار میں 26.15 فیصد کمی ہوئی، آئرن اور اسٹیل مصنوعات کی پیداوار میں 4.76 فیصد کمی ریکارڈ ہوئی۔
اعداد و شمار کے مطابق آٹوموبیل شعبے کی پیداوار میں 47.70 فیصد کی کمی ہوئی، جولائی تا مئی فرنیچر شعبے کی پیداوار میں 32.58 فیصد اضافہ ہوا۔