لاہور : استحکام پاکستان پارٹی کا منشور سامنے آگیا ، جس میں موٹر سائیکل سواروں کو پٹرول کی آدھی قیمتوں پرفراہمی کامنصوبہ ، اوور سیز پاکستانیوں کوووٹ کا حق سمیت مزور کی کم سے کم تنخواہ 50 ہزار روپے ماہانہ کرنا شامل ہیں۔
تفصیلات کے مطابق استحکام پاکستان پارٹی نے سال 2023 کے عام انتخابات کیلئے اپنے منشور کو حتمی شکل دے دی، آئی۔ پی۔ پی کے منشور میں پاکستانی معاشرے کو اسلامی معاشرے میں ڈھالنے، ختم نبوت پر موثر قانون سازی، مدارس کو قومی دھارے میں لانے کے ساتھ معاشی اصلاحات پر بھی کام کرنے کے عزم کا اعادہ کیا گیا ہے۔
منشور میں زرعی اصلاحات کے تحت بارہ ایکڑ تک زرعی اراضی رکھنے والے کو مفت بجلی فراہم کی جائے گی جبکہ مزدور کی کم سے کم ماہانہ تنخواہ 50 ہزار روپے ماہوار مقرر کی جائے گی۔
اس کے علاوہ شہریوں کو 300یونٹس تک بجلی مفت کچی آبادیوں کے لئے مالکانہ حقوق، شہریوں کیلئے اپارٹمنٹ بلڈنگز کے کم لاگت رہائشی منصوبے تیار کئے جائیں گے۔
منشور کے تحت استحکام پاکستان پارٹی موٹر سائیکل سواروں کو پیٹرول کی آدھی قیمتوں پر فراہمی کا منصوبہ بنایا ہے جبکہپ ائیر کنڈیشنڈ پبلک ٹرانسپورٹ، بزرگ شہریوں، خواتین اور سٹوڈنٹس کیلئے مفت سفری سہولتیں فراہم کی جائیں گئیں۔
منشور میں ملک کے لئے آزادانہ اور خودمختار خارجہ پالیسی یقینی بنانے کا وعدہ کیا گیا جبکہ اوور سیز پاکستانیوں کو ووٹ کا حق،پاکستان میں اُن کی جائیدادوں کے تحفظ و انصاف کی فراہمی شامل ہے۔
یوتھ اور خواتین کیلئے آسان شرائط پر بلا سود قرضوں و ملازمتوں کی فراہمی، ٹیکنیکل مراکز کا قیام ، نئے سرکاری میڈیکل و انجینئیرنگ کالج کا قیام، بیرو ن ملک سکالر شپ کی فراہمی منشور کا حصہ ہوگی۔
استحکام پاکستان پارٹی کا منشور منظور ہو گیا، جس میں اہم شعبوں میں بڑے پیمانے پر اصلاحات لانے کا عندیہ دیا گیا ہے۔