لاہور ہائیکورٹ نے چیئرمین کرکٹ بورڈ کے الیکشن 22 روز میں کروانے کا حکم دے دیا۔
اے آر وائی نیوز کے مطابق لاہور ہائیکورٹ کے جج جسٹس شاہد جمیل نے 12 صفحات پر مشتمل فیصلہ جاری کیا جس میں کہا گیا ہے کہ 15 دن کے اندر بورڈ آف گورنر کی تشکیل مکمل کی جائے، بورڈ کی تشکیل کے بعد 7 روز میں چیئرمین پی سی بی کا الیکشن کروایا جائے۔
عدالت کا کہنا ہے کہ حکومت کی تبدیلی کے ساتھ ہی پی سی بی کے مسائل عدالتوں میں آجاتے ہیں، ریاستی اداروں کی سیاسی معاملات میں مداخلت کو دیکھنا چاہیے۔
تحریری فیصلے میں کہا گیا ہے کہ اداروں میں سیاسی مداخلت سے ملک میں عدم استحکام پیدا ہوتا ہے، سیاسی پسند اور ناپسند پر آئین کو ترجیح دے کر استحکام یقینی بناسکتے ہیں۔
عدالتی فیصلے میں کہا گیا کہ 22 جون کو بورڈ آف گورنر کی تبدیلی کا نوٹیفکیشن خلاف قانون جاری کیا گیا۔
ہائیکورٹ کا کہنا ہے کہ 5 جولائی کو مینجمنٹ کمیٹی کی تشکیل کا نوٹیفکیشن درست ہے، وفاقی حکومت کو مینجمنٹ کمیٹی کی تشکیل کا اختیار حاصل ہے۔