شوبز انڈسٹری کی معروف اداکارہ سنیتا مارشل نے بتایا ہے کہ وہ اصل زندگی میں ’بے بی باجی‘ کے کردار ’اسما‘ جیسی ہیں یا نہیں۔
اے آر وائی زندگی کے پروگرام ’دی نائٹ شو ودھ ایاز سموں‘ میں اداکارہ سنتیا مارشل اور ان کے شوہر و اداکار حسن احمد نے شرکت کی اور میزبان کی جانب سے پوچھے گئے مختلف سوالات کے جوابات دیے۔
میزبان نے پوچھا کہ ’آپ اصل زندگی میں بے بی باجی کے کردار ’اسما بھابھی‘ جیسی ہیں یا کردار میں زیادہ معصوم بنی ہوئی ہیں۔
سنیتا مارشل نے کہا کہ کردار میں زیادہ معصوم ہیں لیکن اصل میں اسما کی طرح کی بہت سی لڑکیاں ہیں اگر اپنے آپ کو کہوں تو اس طرح سے اسما نہیں ہوں۔
انہوں نے کہا کہ ’مجھے ایسا لگتا ہے کہ بہت ساری خواتین مجبور بھی ہیں، ان کو سمجھ نہیں آتا کہ ہم کیا کام کریں گے، ہم اکیلے ہوجائیں گے کس طرح سے بچوں کو پالیں گے اور کیسے اکیلے زندگی گزاریں گے۔‘
سنیتا مارشل نے کہا کہ ’لیکن اگر خواتین میں حوصلہ آجائے پھر کوئی بھی قدم اٹھا سکتی ہیں، مجھے یقین ہے کہ ہماری سوسائٹی میں اسما جیسی بہت ساری خواتین موجود ہیں لیکن ان کے لیے سبق یہی ہے کہ کوشش کریں کہ مالی طور پر خود مختار رہیں تاکہ آپ اپنا اچھا اور برا زیادہ بہتر طریقے سے سمجھ سکیں۔
واضح رہے کہ سنیتا مارشل اے آر وائی ڈیجیٹل کے ڈرامہ سیریل ’بے بی باجی‘ میں اسما کا کردار نبھا رہی ہیں جبکہ ان کے شوہر و اداکار حسن احمد ’نصیر‘ ان کے شوہر کا کردار ادا کررہے ہیں۔
ڈرامے میں دکھایا گیا ہے کہ اسما شوہر کے ظلم و ستم کے باوجود بیٹے کی خاطر ان کے ساتھ گزر بسر کررہی ہیں۔