کراچی: قومی ایئرلائن (پی آئی اے) اور فیڈرل بورڈ آف ریونیو( ایف بی آر) کے درمیان اکاؤنٹس کی بحالی کیلیے معاملات طے پا گئے۔
ترجمان پی آئی اے نے بتایا کہ بینک اکاؤنٹس جلد ہی بحال کر دیے جائیں گے، ضروری کاغذی کارروائی کے بعد اکاؤنٹس بحال کیے جائیں گے۔
گزشتہ روز ایف بی آر نے پی آئی اے کے اکاؤنٹس منجمد کر دیے تھے۔ ایف بی آر کی جانب سے یہ اقدام واجبات کی عدم ادائیگی پر کیا گیا، پی آئی اے پر گزشتہ کئی ماہ کے ٹیکسز پر مبنی 2 ارب سے زائد کے واجبات ہیں۔
ایف بی آر ذرائع نے بتایا تھا کہ واجبات کی عدم ادائیگی پر پی آئی اے کے 53 اکاؤنٹس گزشتہ سال بھی منجمد کیے گئے تھے۔
انتظامیہ کی جانب سے واجبات کی جلد ادائیگی کی یقین دہانی پر ان اکاؤنٹس کو بحال کیا گیا تھا لیکن اب پی ایس او نے قومی ایئر لائن کی 3 پروازوں کو فیول کی فراہمی سے بھی انکار کر دیا ہے۔
فیول کی عدم فراہمی کے باعث اسلام آباد سے کراچی کی پرواز پی کے309، کراچی تا ملتان کی پی کے330متاثر ہوئیں۔
اس کے علاوہ طیارے میں فیول نہ ہونے کی وجہ سے ملتان سے جدہ کی پرواز پی کے739بھی متاثرہ پروازوں میں شامل ہے۔
ترجمان پی آئی اے نے اکاؤنٹس بندش کی تصدیق کرتے ہوئے کہا ہے کہ اکاؤنٹس بحالی کے لئے ایف بی آر سے حکومتی سطح پر رابطے جاری ہیں، اکاؤنٹس بندش کے باوجود راحال فضائی آپریشن جاری ہے۔