لاہور : لاہور ہائی کورٹ نے پرائیویٹ میڈیکل کالجز کا اسٹڈی پروگرام کے دوران فیس میں اضافہ غیر قانونی قرار دے دیا۔
تفصیلات کے مطابق لاہورہائیکورٹ میں پرائیویٹ میڈیکل کالجز کے اسٹڈی پروگرام کے دوران فیس میں اضافے کیخلاف کیس کی سماعت ہوئی۔
عدالت نے فیصلہ سناتے ہوئے پرائیویٹ میڈیکل کالجز کا اسٹڈی پروگرام کے دوران فیس میں اضافہ غیر قانونی قرار دے دیا اور کہا دوران تعلیم ٹیوشن فیس اور دیگر چارجز میں اضافہ غیر قانونی ہے۔
جسٹس شاہد جمیل نے ایک ہی نوعیت کی مختلف پٹیشنز پر فیصلہ جاری کیا، جس میں کہا کہ پی ایم ڈی سی یقینی بنائے داخلے کے وقت بتائی گئی ٹیوشن فیس ہی وصول کریں، فیصلے پر عملدرآمد کی رپورٹ 45 دن میں ڈپٹی رجسٹرار کے روبرو جمع کرائی جائے۔
عدالت کا کہنا تھا کہ کئی اہم فیصلے انگریزی میں ہونے کی وجہ سے شہریوں کو سمجھ نہیں آتے، فیصلوں کے اردو میں ترجمے کیلئے تجاویز چیف جسٹس لاہور ہائیکورٹ کو بھجوائی جائے۔
جسٹس شاہد جمیل کا کہنا تھا کہ فیصلےکا اردو ترجمہ تحریر کرنے والے جج کی اجازت سے کیا جائے، زبان کا یہ مسئلہ آئین میں دیئے گئے معلومات کے حصول کے حق میں رکاوٹ ہے، سچ یہ ہے کہ ریاستی لیول پر اس ضمن میں کوئی قدم نہیں اٹھایا گیا۔