کراچی : اورنگی سے چھ سالہ بچے ایان کو اغوا کرلیا گیا، اغوا کاروں کی جانب سے 8 کروڑ روپے تاوان کا مطالبہ کیا گیا ہے۔
تفصیلات کے مطابق کراچی کے علاقے اورنگی میں اغوا کاروں نے چھ سالہ بچے ایان کو اغوا کرکے 8کروڑ روپے تاوان کا مطالبہ
کردیا۔
واقعہ کا مقدمہ اورنگی ٹاؤن تھانے میں دادا کی مدعیت میں درج کرلیا گیا ہے ، بچے کے دادا کا کہنا ہے کہ صبح ایان، عائشہ اور اربش کو اسکول چھوڑنے کیلئے جا رہا تھا کہ پینٹ شرٹ پہنے دو افراد زبردستی گاڑی میں بیٹھ گئے۔
مدعی مقدمے کا کہنا تھا کہ ملزمان گاڑی میں بیٹھے اور کے ڈی اے چورنگی لے گئے، کے ڈی اے چورنگی پر ملزمان کا ساتھی موٹر سائیکل لے آیا، ملزمان نے مجھے اور بچیوں کو چھوڑ دیا۔
مقدمے میں کہا کہ ملزمان ایان کو اغوا کرکے موٹر سائیکل پر لے گئے، ملزمان نے مجھے کہا کہ آٹھ کروڑ روپے دے دینا پوتا مل جائے گا۔
پولیس کا کہنا ہے مقدمہ درج کرلیا ہے، واقعے کی تفتیش جاری ہے۔