اسلام آباد: پاکستان میں بیس کروڑ ڈالر براہ راست بیرونی سرمایہ کاری کی راہ ہموار ہوگئی، پاکستان منرل ڈیولپمنٹ کارپوریشن اور امریکی کمپنی کے درمیان معاہدہ طے پاگیا۔
تفصیلات کے مطابق پاکستان سے گلابی نمک کی برآمد کے حوالے سے اہم پیش رفت سامنے آئی ہے۔
پنک سالٹ کی برآمد کیلئے بیس کروڑ ڈالر براہ راست بیرونی سرمایہ کاری کی راہ ہموار ہوگئی، اس سلسلے میں پاکستان منرل ڈویلپمنٹ کارپوریشن اور امریکی کمپنی کے درمیان ایم او یو طے پاگیا ہے ۔
ایم ڈی پی ایم ڈی سی اور امریکی کمپنی کے سی ای او نے ایم او یو پر دستخط کئے ، اس موقع پر ایم ڈی پی ایم ڈی سی اسد احمد نے میڈیا سے گفتگو میں کہا کہ جدید پنک راک سالٹ کرشنگ اینڈ پیکجنگ فیسیلٹی قائم کی جائے گی یہ سہولت صرف نمک کی برآمد کیلئے استعمال کی جائے گی۔
ان کا کہنا تھا کہ پنک سالٹ کی ایکسپورٹ کیلئے پلانٹ خصوصی اقتصادی زون ضلع میانوالی میں لگایا جائے گا، جس سے پاکستان پنک سالٹ کی عالمی مارکیٹ میں نمایاں جگہ بناسکے گا۔
ایم ڈی پی ایم ڈی سی نے مزید کہا کہ دنیا میں پنک سالٹ کی 12 ارب ڈالرکی مارکیٹ ہے، ہم ڈیڑھ لاکھ ٹن سالانہ پنک سالٹ برآمد کرسکتے ہیں-
ان کا کہنا تھا کہ عالمی مارکیٹ میں اپنا حصہ لینے کی کوشش کریں گے اوریہ پنک سالٹ عالمی مارکیٹ میں پاکستان کے نام سے ہی فروخت ہو۔