اسلام آباد: محکمہ موسمیات نے ملک کے بیشتر علاقوں میں 14 اگست کے دن بارش اور بالائی حصوں میں بھی مزید مون سون بارشوں کی پیشگوئی کر دی۔
بحیرہ عرب سے مون سون ہوائیں ملک کے بالائی علاقوں میں داخل ہو رہی ہیں۔ 13 اگست کو مغربی ہوائیں بھی بالائی علاقوں میں اپنا اثر دکھائیں گی۔ 13 سے 16 اگست کشمیر، گلگت، مری، اسلام آباد، راولپنڈی و دیگر شہروں میں بارش کا امکان ہے۔
محکمہ موسمیات کے مطابق 14 سے 16 اگست تک کرم، لکی مروت، ڈی آئی خان، کرک اور وزیرستان میں بھی بارش کا امکان ہے۔
ڈی جی خان، راجن پور، موسیٰ خیل، بارکھان، ژوب قلات میں تیز ہواؤں اور بارش کا امکان ہے جبکہ 14 اور 15 اگست کے دوران اسلام آباد راولپنڈی، گوجرانوالہ اور لاہور میں موسلادھار بارش ہو سکتی ہے۔
بارش کے باعث راولپنڈی، اسلام آباد، پشاور، گوجرانولہ اور لاہور کے نشیبی علاقے زیرِ آب آنے کا خدشہ ہے۔ مری، گلیات، گلگت بلتستان، خیبر پختونخوا اور آزاد کشمیر کے پہاڑی علاقوں میں لینڈ سلائیڈنگ کا خدشہ ہے۔