راولپنڈی: سکیورٹی فورسز نے بلوچستان کے ضلع کیچ میں کامیاب کارروائی کرتے ہوئے دو دہشتگردوں کو ہلاک کر دیا۔
فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے مزبند کے پہاڑی سلسلے میں دہشتگردوں کے خلاف انٹیلیجنس بیسڈ آپریشن کیا جس میں 2 دہشتگردوں مارے گئے جبکہ ایک دہشتگرد زخمی ہوا۔
دہشتگردوں سے بھاری مقدار میں اسلحہ اور گولہ بارود برآمد کیا گیا۔ ہلاک شر پسند معصوم شہریوں اور قانون نافذ کرنے والے اداروں کو نشانہ بنانے میں ملوث تھے۔
آئی ایس پی آر کے مطابق سکیورٹی فورسز دہشتگردی کی لعنت کے خاتمے اور پاکستان کے دشمنوں کے مذموم عزائم کو ہر قیمت پر ناکام بنانے کیلیے پُرعزم ہے۔
جولائی میں شمالی بلوچستان میں ژوب گیریژن پر دہشتگرد حملے کے بعد جاری کلیئرنس آپریشن میں بھاری ہتھیاروں سے لیس تمام 5 دہشتگردوں کو ہلاک کیا گیا تھا جبکہ اس دوران پاک فوج کے 9 جوانوں نے جامِ شہادت نوش کیا تھا۔