اسلام آباد: پاکستان تحریک انصاف (پی ٹی آئی) نے 90 روز کی آئینی مدت میں عام انتخابات کے انعقاد کیلیے نگراں وزیر اعظم انوار الحق کاکڑ کو خط لکھ دیا۔
وائس چیئرمین پی ٹی آئی شاہ محمود قریشی کی جانب سے لکھے گئے خط کے مطابق ’نگراں وزیر اعظم کا عہدہ سنبھالنے پر مبارکباد پیش کرتے ہیں۔ ملک دستور کی مکمل تباہی کے دہانے پر کھڑا ہے۔ سابق حکومت نے خود کو احتساب سے بچانے کیلیے حربے استعمال کیے اور پی ٹی آئی کو انتخابی دوڑ سے باہر کرنے کیلیے اداروں کا بے دریغ استعمال کیا۔‘
خط کے مطابق ’سابق وزیر اعظم و چیئرمین پی ٹی آئی کو اٹک جیل میں انسانیت سوز حالات میں رکھا گیا ہے۔ ان کو آئین اور جیل قوانین میں فراہم بنیادی حقوق سے محروم رکھا جا رہا ہے۔ آئین اور جیل قواعد کے مطابق بنیادی حقوق کی فراہمی کیلیے اقدامات کیے جائیں۔‘
شاہ محمود قریشی نے نگراں وزیر اعظم کو لکھا کہ پی ٹی آئی کے 10 ہزار سے زائد کارکنان پابند سلاسل ہیں جبکہ عدالتوں کے آئینی احکامات کی توہین جاری ہے۔
’ملک کو پھر سے آئین و قانون کی راہ پر چلانے کا وقت آن پہنچا ہے۔ آئین اسمبلی کی قبل ازوقت تحلیل کی صورت میں 90 روز میں انتخابات کا حکم دیتا ہے۔ مطالبہ ہے کہ آپ انتخابات کے بروقت انعقاد کو یقینی بنائیں۔‘
پی ٹی آئی نے کہا کہ نئی حلقہ بندیوں پر انتخابات میں التوا کا بہانہ ہرگز نہیں بنایا جا سکتا، مشترکہ مفادات کونسل کے فیصلے کو عدالت میں چیلنج کرنے کا ارادہ رکھتے ہیں، انتخابات کی ساکھ کیلیے لازم ہے فریقین کو انتخابی مقابلے کیلیے مساوی میدان فراہم کیا جائے۔
’آپ کو سونپے جانے والے عظیم فریضہ کی انجام دہی میں اپنے تعاون کا یقین دلاتے ہیں۔‘