سابق وزیراعظم و صدر مسلم لیگ ن شہبازشریف نے کہا کہ قائد نوازشریف اکتوبرمیں پاکستان جائیں گے اور قانون کا سامنا کرنے کے ساتھ ساتھ الیکشن مہم کی قیادت کریں گے۔
لندن میں نوازشریف سے ملاقات کے بعد گفتگو کرتے ہوئے شہبازشریف نے کہا کہ پاناما لیکس میں سیاستدانوں سمیت ساڑھے400 افراد کے نام تھے اور نوازشریف کا نام سازش سے پاناما کیس میں شامل کیا گیا نوازشریف کے خلاف بدنیتی پر مبنی فیصلہ دیا گیا تھا دعا ہےاللہ تعالیٰ بعض افراد کو ہدایت دے۔
انہوں نے کہا کہ نوازشریف کےخلاف کیسز کی حقیقت سامنے آچکی ہے اڈیالہ جیل میں نوازشریف اور ان کی بیٹی کو زمین پر سلایاگیا نوازشریف اور ان کی بیٹی کو جیل کا کھانا دیا گیا جب وہ اڈیالیہ جیل میں تھے تو بھابھی شدیدعلیل تھیں نوازشریف کی کوشش کی باوجوداہلیہ سےبات نہ کرنے دی گئی یہ ہے بعض افرادکا دہرا معیار جس نے انصاف کے نظام کو تباہ کیا۔
سابق وزیراعظم کا کہنا تھا کہ نوازشریف پاکستان آئیں اور قانون کا سامنا کریں گے صاف و شفاف احتساب وقت کی ضرورت ہے ہم نے آئین کے مطابق اسمبلی تحلیل کی اب الیکشن کمیشن کی ذمہ داری ہے کہ عام انتخابات ہوں، صاف و شفاف انتخابات کیلئے الیکشن کمیشن سے تعاون کریں گے۔
شہبازشریف نے کہا کہ چیئرمین پی ٹی آئی، شہزاداکبر نے قوم کا کروڑوں روپیہ ضائع کیا این سی اے میں مجھے اور نوازشریف کو کلین چٹ ملی۔