اسلام آباد: نگران حکومت نے غیر ضروری ضمنی گرانٹس کے اجرا پر پابندی لگا دی موجودہ مالی سال سرکاری فنڈز کے استعمال سے متعلق حکمت عملی تیار کردی گئی۔
تفصیلات کے مطابق نگران حکومت نے نئی منتخب حکومت کے قیام تک سخت قسم کی کفایت شعاری پالیسی پر عمل درآمد کا فیصلہ کیا ہے، اس سلسلے میں غیر ضروری اخراجات کو روکا جائے گا۔
وزارت خزانہ کا اس حوالے سے کہنا ہے کہ صرف قدرتی آفات کے دوران ہی ہنگامی ضروری فنڈز جاری ہو سکیں گے، بجٹ میں غیر اعلانیہ منصوبوں یا دیگر مد میں فنڈز خرچ نہیں کیئے جائیں گے۔
وزارت خزانہ کے مطابق اگر کسی کو اضافی سپلمنٹری گرانٹ لینا ہو تو اسے سرٹیفکیٹ جمع کرانا ہوگا ساتھ ہی متعلقہ وزارت کے پرنسپل اکاؤنٹنگ افسر کو فنڈز کیلئے جواز پیش کرنا ہوگا۔
وزارت خزانہ کا مزید کہنا ہے کہ بجٹ ونگ مطلوبہ اضافی فنڈز کیلئے بغور جانچ پڑتال کرے گا، کسی قسم کے اضافی فنڈز کیلئے کابینہ اور ای سی سی سے منظوری لینا لازمی قرار دیا گیا ہے۔