دریائے چترال پر چیئر لفٹ پھنس گئی، سواروں کو بچا لیا گیا

اپر چترال کے علاقے کوراغ کے مقام پر دریائے چترال پر قائم چیئر لفٹ پھنس گئی جس میں سوار تینوں افراد کو بر وقت آپریشن کرکے ریسکیو کر لیا گیا۔

اے آر وائی نیوز کے مطابق دریائے چترال پر چیئر لفٹ پھنسنے کا واقعہ ڈولی کی رسی ٹوٹنے کے باعث پیش آیا۔ اطلاع ملتے ہی ریسکیو 1122 کی ٹیم موقع پر پہنچ گئی اور 45 منٹ کے آپریشن کے دوران اس میں سوار تینوں افراد کو بحفاظت ریسکیو کر لیا گیا۔

ترجمان کے مطابق ریسکیو اہلکار ٹوٹی رسی پر رنگ کی مدد سے ریپیلنگ کرتے ہوئے ڈولی تک پہنچا اور ڈولی کو صحیح کرتے ہوئے رسی سے باندھ دیا اور واپس ریپیلنگ کرتے ہوئے کنارے پر پہنچ کر ڈولی کو کھینچ کر کنارے پر منتقل کیا۔

ترجمان ریسکیو کے مطابق اس آپریشن میں 45 منٹ لگے، تینوں افراد گہکیر سے بونی آ رہے تھے۔

واضح رہے کہ گزشتہ ہفتے بٹگرام میں چیئر لفٹ کی دو رسیاں ٹوٹنے کے باعث 7 طلبہ اور ایک ٹیچر 16 گھنٹے تک زمین سے ہزاروں فٹ بلندی پر پھنسے رہے تھے۔