بھارتی میڈیا پر پاکستانی فاسٹ بولرز کا خوف طاری ہوگیا جس کی وجہ سے انہوں نے پروپیگنڈا شروع کردیا ہے۔
ایشیا کپ میں پاکستان اور بھارت کے درمیان اہم میچ کل بروز ہفتہ 2 ستمبر کو سری لنکا کے پالی کیلے اسٹیڈیم میں کھیلا جائے گا جس سے متعلق شائقین کرکٹ بھی پرجوش ہیں۔
بھارتی میڈیا نے فاسٹ بولر شاہین شاہ آفریدی کی فٹنس پر سوال اٹھانا شروع کر دیے اور پروپیگنڈا کیا جا رہا ہے کہ شاہین آفریدی نیپال کے خلاف میچ کے دوران فٹنس مسائل سے دوچار ہوئے۔
بھارتی میڈیا کا کہنا ہے کہ نیپال کے خلاف میچ میں میڈیکل اسٹاف نے باؤنڈری لائن پر شاہین آفریدی کی ٹریٹمنٹ کی۔
بھارتی میڈیا نے شاہین آفریدی کے پاک بھارت میچ سے ممکنہ باہر ہونے پر متبادل بولر کا نام بھی دے دیا اور کہا کہ محمد وسیم جونئیر کو بھارت کے خلاف میچ میں شاہین کی جگہ کھلایا جائے گا۔
اس حوالے سے ٹیم مینجمنٹ کا کہنا ہے کہ شاہین آفریدی نے نیپال کے خلاف مکمل فٹنس کے ساتھ پانچ اوورز کیے، شاہین آفریدی مکمل فٹ ہیں انہیں کوئی مسئلہ نہیں ہے، گرم موسم کی وجہ سے شرٹ تبدیل کرنے کے لیے باہر گئے اور پھر شاہین آفریدی واپس آ گئے تھے۔