پاکستان ترکیہ تعلقات مضبوط اور برادرانہ ہیں جو ہمیشہ قائم رہیں گے، آرمی چیف

راولپنڈی: آرمی چیف جنرل عاصم منیر کا کہنا ہے کہ پاکستان اور ترکیہ کے درمیان تعلقات مضبوط اور برادرانہ ہیں جو ہمیشہ قائم رہیں گے۔

فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے ترکیہ کا سرکاری دورہ کیا جس کا مقصد دونوں ممالک میں فوجی اور دفاعی تعاون کو بڑھانا ہے۔

آرمی چیف نے ترکیہ کے صدر رجب طیب اردوان سمیت وزیر دفاع، وزیر خارجہ اور دیگر اعلیٰ حکام سے بھی ملاقاتیں۔ ان کی ترک جنرل اسٹاف کے کمانڈر اور ترکیہ کی بری اور فضائی افواج کے کمانڈروں سے بھی ملاقات ہوئی۔

https://x.com/Communications/status/1701943063843655903?s=20

ملاقاتوں کے دوران جنرل عاصم منیر نے خطے میں امن و استحکام کیلیے ترک افواج کی کوششوں کو سراہا اور ترکیہ کی مسلح افواج کی آپریشنل تیاریوں کے معیار کی تعریف کی۔ ترک رہنماؤں نے ترکیہ میں زلزلے میں پاکستانی آرمی انجینئرز کی خدمات کا بھی اعتراف کیا۔

جنرل عاصم منیر نے ترکیہ کے عظیم رہنما مصطفیٰ کمال اتاترک کے مزار پر حاضری دی اور پھول رکھے۔

آرمی چیف کا ترک لینڈ فورسز کے ہیڈ کوارٹرز آمد پر پرتپاک استقبال کیا گیا اور انہیں چاق و چوبند دستے نے گارڈ آف آنرپیش کیا۔

اس موقع پر آرمی چیف کا کہنا تھا کہ پاک فوج ترکیہ کی افواج کو تعاون فراہم کرنے کیلیے ہمیشہ تیار ہے، پاکستان ہمیشہ اپنے ترک بھائیوں کے ساتھ ہر لمحے کھڑا رہا ہے، دونوں ممالک کے درمیان برادرانہ تعلقات کو مزید مضبوط کریں گے۔