بالی ووڈ کے معروف اداکار گووندا سے ایک ہزار کروڑ روپے کی آن لائن فراڈ اسکیم سے تعلق کے سلسلے میں پوچھ گچھ کی جائے گی۔
بھارتی میڈیا رپورٹس کے مطابق اداکار گووندا نہ تو ملزم ہیں نہ ہی ان پر شک ہے لیکن وہ معاشی جرائم ونگ (ای او ڈبلیو) نامی ایجنسی کے لیے گواہ بن سکتے ہیں۔
ایک کمپنی نے کرپٹو سرمایہ کاری کے نام پر غبن کیا ہے اور گووندا نے ویڈیوز کے ذریعے اس کمپنی کی تشہیر کی تھی۔
کمپنی نے 10 ہزار افراد سے 30 کروڑ روپے ہتھیائے ہیں، جن میں بہار، اترپردیش، پنجاب، راجستھان، ہریانہ، دہلی، جھارکھنڈ اور دیگر ریاستوں میں موجود سرمایہ کار شامل ہیں۔
بھارتی ایجنسی نے 7 اگست کو کمپنی کے کنٹری ہیڈ اور ریاست اڑیسہ کے سربراہ کو گرفتار کرلیا تھا۔
ای او ڈبلیو کے آئی جی نے کہا کہ ہم جلد ہی ممبئی ایک ٹیم بھیجیں گے جو گووندا سے تفتیش کرے گی۔
انہوں نے کہا کہ فلم اسٹار نے مذکورہ کمپنی کے گوا میں منعقدہ فنکشن میں شرکت کی تھی اور کچھ ویڈیوز بنا کر اس کی تشہیر بھی کی تھی۔