قطر: وزارت داخلہ کی جانب سے گاڑی مالکان کے لئے خاص ہدایت جاری کی گئی ہے، جبکہ گاڑیوں میں نصب غیر قانونی ٹینٹڈ شیشوں کے خلاف بڑے پیمانے پر کریک ڈاؤن کا آغاز کردیا گیا ہے۔
بین الاقوانی خبر رساں ادارے کی رپورٹ کے مطابق قطر کی وزارت داخلہ کے جنرل ڈائریکٹوریٹ آف ٹریفک نے گزشتہ آٹھ ماہ کے دوران گاڑیوں کے شیشوں کو ٹِنٹنگ کرنے پر گاڑی چلانے والوں کے خلاف 10,173 خلاف ورزیاں ریکارڈ کی ہیں۔
ٹریفک پولیس نے سال کے آغاز سے لے کر اب تک اپنی گاڑیوں سے اونچی آواز پیدا کرنے پر موٹرسواروں کے خلاف 4,405 خلاف ورزیاں درج کی ہیں۔
یہ اعداد و شمار جنرل ڈائریکٹوریٹ آف ٹریفک نے ٹوئٹر پر ایک ویڈیو پیغام میں جاری کئے، اس ویڈیو کو محکمہ کی جانب سے گاڑی چلانے والوں کی جانب سے ٹریفک قوانین کی تعمیل کو یقینی بنانے کے لیے ایک حالیہ مہم کے حصے کے طور پر جاری کیا گیا ہے۔
جاری کی گئی ویڈیو میں دیکھا جاسکتا ہے کہ ایک ٹریفک افسر پیغام دے رہا ہے کہ ہم گاڑیوں کے لیے ٹریفک سیفٹی قوانین کی تعمیل کو یقینی بناتے ہیں، خاص طور پر کچھ گاڑیوں کے انجن سے آنے والے شور کے حوالے سے، جو دوسروں کو تکلیف اور دشواری کا باعث بنتا ہے۔
ویڈیو پیغام میں ٹریفک افسر نے کہا کہ میں واضح کرنا چاہوں گا کہ شفاف فلم زیرو/زیرو سورج سے تحفظ فراہم کرنے میں تاریک فلموں کی طرح کارکردگی کا مظاہرہ کرتی ہے، لیکن اس سے مرئیت میں کمی نہیں آتی،”افسر نے مزید کہا کہ لیکھویہ پیٹرولز نے اس مقصد کیلئے ٹریفک پیٹرولز کیساتھ ملکر مہم میں حصہ لیا۔
ٹریفک افسر نے کہا کہ ہم سخت موسم اور چلچلاتی دھوپ کو سمجھتے ہیں، لیکن حفاظت کو یقینی بنانا ہر کسی کے مفاد میں ہے۔ انہوں نے کہا کہ سائنسی مطالعات میں ثابت ہوا ہے کہ سیاہ فلمیں بینائی کو کم کرتی ہیں اور سڑک استعمال کرنے والوں کے لیے خطرے کا باعث بنتی ہیں۔
ویڈیو پیغام میں ٹریفک افسر نے کہا کہ اگر یہ کاریں گھروں میں بیٹھے افراد کے لئے مشکل کا باعث بن سکتی ہیں تو سڑک استعمال کرنے والوں پر اس کے اثرات کے بارے میں سوچیں، ٹریفک افسر نے کہا کہ گاڑی چلانے والے اپنی اور دوسروں کی حفاظت کے لیے ٹریفک کے حفاظتی اصولوں پر عمل کریں۔
ٹریفک افسر کا اپنے ویڈیو پیغام میں واضح طور پر کہنا تھا کہ خلاف ورزی کی صورت میں، جنرل ٹریفک ڈیپارٹمنٹ گاڑیوں کے خلاف، خلاف ورزیوں کو ریکارڈ کرنے میں کوئی ہچکچاہٹ محسوس نہیں کرے گا۔