پاکستان گلوبل ویٹرنز کپ کرکٹ ٹورنامنٹ کے سیمی فائنل میں پہنچ گیا

پاکستان نے اوور 40 گلوبل کپ کرکٹ ٹورنامنٹ میں کینیڈا کو 78 رنز سے شکست دے کر مسلسل پانچویں فتح حاصل کی اور سیمی فائنل میں جگہ بنا لی۔

کراچی میں کھیلے جا رہے اوور 40 گلوبل کپ کرکٹ ٹورنامنٹ میں گزشتہ روز پاکستان نے کینیڈا کو 78 رنز سے شکست دے دی۔ جو ایونٹ میں قومی ویٹرنز ٹیم کی مسلسل پانچویں فتح ہے۔ اس جیت کے ساتھ ہی پاکستان ٹیم نے سیمی فائنل کے لیے ٹکٹ کٹا لیا۔

کینیڈا کے خلاف نیشنل اسٹیڈیم میں کھیلے گئے میچ میں پاکستان ویٹرنز کی قیادت مصباح الحق کی عدم موجودگی کے باعث عبدالرزاق نے کی۔ قومی ویٹرنز ٹیم نے پہلے بیٹنگ کرتے ہوئے مقررہ 45 اوورز میں 8 وکٹوں کے نقصان پر 312 رنز بنائے۔

سابق ٹیسٹ آل راؤنڈر ویٹرنز کپتان عبدالرزاق نے جارحانہ انداز میں 43 گیندوں پر 5 چوکوں اور 6 چھکوں کی مدد سے 70 رنز کی عمدہ اننگ کھیلی۔ رضوان اسلم نے 47، سابق ٹیسٹ کرکٹر حسن رضا نے 42، امجد علی نے 33 اور جنید نینی تال والا نے 31 رنز اسکور کیے۔

کینیڈا کی جانب سے اجے شرما کی 5 وکٹیں حاصل کرکے توجہ سمیٹی۔

ہدف کے تعاقب میں کینیڈا کی ٹیم 234 رنز بنا سکی، اتما رام پرسود نے ناقابل شکست 61 اور ایازعلی نے 47 رنز کی اننگز کھیلیں، حسن رضا نے 2 کھلاڑیوں کو آوٹ کیا۔

پی ایس ایل 9 کب ہوگا، ٹیموں میں اضافہ ہوگا یا نہیں؟ فیصلہ ہوگیا

ایونٹ کے دیگر میچز میں کراچی جیمخانہ گراونڈ پرامریکا نے آسٹریلیا کو 77 رنز سے زیر کیا جب کہ این بی پی اسپورٹس کمپلیکس پر ویسٹ انڈیز نے نیپال کو 8 وکٹوں سے ہرایا۔