واشنگٹن : امریکی میڈیا نے انکشاف کیا ہے کہ ہردیپ سنگھ پر قتل میں چھ ملزمان ملوث ہے ، ان پر پچاس گولیاں برسائیں گئیں ، جس میں سے چونتیس گولیاں انھیں لگیں۔
تفصیلات کے مطابق امریکی میڈیا سکھ رہنما ہردیپ سنگھ کے قتل سے متعلق سنسنی خیز انکشافات سامنے لے آیا، جس میں بتایا گیا کہ کینیڈا میں مقامی گوردوارے میں ہردیپ سنگھ پرکتنی گولیاں برسائی گئیں اور ملزمان کتنے تھے؟۔
امریکی اخبار واشنگٹن پوسٹ کی رپورٹ میں بتایا گیا ہے کہ ہردیپ سنگھ نجر کے قتل میں تین نہیں بلکہ چھ ملزمان ملوث ہیں، ملزمان نے سکھ رہنما پر پچاس گولیاں برسائیں، جن میں سےہردیپ سنگھ نجر کو چونتیس گولیاں لگیں۔
واشنگٹن پوسٹ نے عینی شاہدین اور سی سی ٹی وی کی بنیاد پر لکھا قتل میں ملوث ملزمان نے دو گاڑیاں استعمال کیں، ملزمان کی ایک گاڑی نے ہردیپ کی گاڑی کو پارکنگ میں ہی روکا اور اچانک دو نقاب پوش ملزمان نے فائرنگ کی۔
امریکی میڈیا کےمطابق ایک عینی شاہد نے بتایا اس نے ملزمان کا پیچھا کیا، ملزمان سکھوں کے حلیے میں تھے اور بھاگ کر ایک اور سلور کار میں بیٹھ گئے اور قتل کے بارہ سے بیس منٹ بعد پولیس جائے وقوع پہنچی۔
کینیڈین وزیردفاع کا کہنا ہے اگر الزامات ثابت ہوئے تو بھارت سے تعلقات پر بھی اس کے اثرات مرتب ہوں گے کیونکہ ہماری سرزمین پر کینیڈین شہری کا قتل خودمختاری کی خلاف ورزی ہے۔