بھارتی کرکٹ ٹیم کے سابق فاسٹ بولرعرفان پٹھان نے پاکستان کرکٹ ٹیم کے حوالے سے ایک بار پھر تعصبانہ رویہ اختیار کیا۔
عرفان پٹھان نے سماجی رابطے کی سائٹ ٹوئٹر (ایکس) پر اپنی چار سیمی فائنلسٹ ٹیموں کے ناموں کے حوالے سے آگاہ کیا، انہوں نے بھارت، جنوبی افریقہ، آسٹریلیا اور دفاعی چیمپئین انگلینڈ کو اپنی فیورٹ ٹیموں میں شامل کیا۔
سابق فاسٹ بولر کا آسٹریلیا کے حوالے سے کہنا تھا کہ آسٹریلیا کی آئی سی سی ایونٹس میں تاریخ کسی سے چھپی نہیں ہے، انکے پاس تجربہ کار ٹیم اور شاندار آل راؤنڈرز موجود ہیں جو کسی بھی وقت ہار کو جیت میں بدل سکتے ہیں۔
جنوبی افریقہ کا ذکر کرتے ہوئے سابق آل راؤنڈر نےکہا کہ جنوبی افریقہ کی آئی سی سی ٹورنامنٹس میں شاندار کارکردگی پیش کرنے کی تاریخ ہے اور انکی حالیہ کارکردگی بہت شاندار رہی ہے۔
سابق بھارتی فاسٹ بولر نے کہا کہ ورلڈ کپ میں بھارتی ٹیم فیورٹ کے طور پردکھائی دے گی، ٹیم میں تجربہ کار اور سینئر کھلاڑیوں کی موجودگی اور ہوم ایڈوانٹیج سمیت مضبوط بیٹنگ، بولنگ لائن کیساتھ انڈیا کی ٹیم پہلے نمبر پر ہے۔
عرفان پٹھان کا کہنا تھا کہ وائٹ بال کرکٹ فارمیٹ میں انگلینڈ اپنے جارحانہ اور بے خوف انداز کیلئے جانا جاتا ہے، انکی بیٹنگ اور بولنگ لائن بہت زبردست ہے جو انہیں ٹورنامنٹ میں ٹاپ فور میں شامل کرتی ہے۔