اسلام آباد: عدالت نے شادی سے انکار پر 24 سالہ لڑکی کو قتل کرنے والے لڑکے کے خلاف کیس کا فیصلہ سنا دیا۔
سیشن کورٹ نے وفاقی دارالحکومت کے رہائشی شہزاد کو 25 سال قید کی سزا سنا دی۔ سیشن جج اعظم خان نے کیس کا محفوظ فیصلہ سنا دیا۔
عدالتی فیصلے میں کہا گیا کہ پراسیکیوشن مجرم شہزاد کے خلاف کیس ثابت کرنے میں کامیاب رہی، مجرم کو 25 قید کی سزا اور باقی 3 ملزمان کو بری کیا جاتا ہے۔
اسسٹنٹ ڈسٹرکٹ پبلک پراسیکیوٹر رانا حسن عباس نے کیس کی پیروی کی۔
خیال رہے کہ شہزاد نامی لڑکے نے رشتے کیلیے 24 سالہ لڑکی کے گھر فیملی کو بھیجا تھا تاہم لڑکی کی فیملی نے رشتے سے انکار کر دیا تھا جس کے بعد ملزم 3، 4 ماہ لڑکی کو دھمکیاں دیتا رہا۔
مجرم نے 30 نومبر 2020 کو لڑکی کا پیچھا کر کے اسے گولی مار کر قتل کر دیا۔ مجرم کے خلاف تھانہ کورال میں مقدمہ درج کروایا گیا تھا۔