کراچی: ڈالر کی اسمگلنگ اور ذخیرہ اندوزی کے خلاف کریک ڈاؤن کے مثبت اثرات آنے لگے۔ ایکسچینج کمپنیز میں ریکارڈ 220 ملین ڈالر جمع کروائے گئے۔
فاریکس ایسوسی ایشن کے صدر ملک بوستان نے اپنے بیان میں کہا کہ ایکسچینج کمپنیز میں اکتوبر کے 17 دن میں ریکارڈ 220 ملین ڈالر جمع ہوئے جبکہ صرف آج کے ہی دن 25 ملین ڈالر جمع کروائے گئے۔
ملک بوستان نے کہا کہ آج بھی اوپن مارکیٹ میں ڈالر کی ڈیمانڈ نہ ہونے کی برابر رہی، ستمبر میں 126 ملین کمرشل بینکوں کے ذریعے اسٹیٹ بینک میں سرینڈر کیے گئے تھے، امپورٹرز کی جانب سے ایل سیز کیلیے ڈالر میچور کروانے پر انٹر بینک میں تھوڑی ڈیمانڈ بڑھی۔
انہوں نے بتایا کہ انٹر بینک میں ڈالر مزید کمزور ہوگا اور 250 روپے تک جائے گا، پہلی بار ایکسپورٹرز کی جانب سے فاروڈ ڈٰیلنگ کی جا رہی ہے، ایکسپورٹرز کے ایڈوانس سودوں کی وجہ سے بڑے پیمانے پر ڈالرز آ رہے ہیں۔
ان کا کہنا تھا کہ بیرون ملک سے ترسیلات زر میں بھی اضافہ ہو رہا ہے، افغانستان واپس جانے والے افغانی بھی کچھ ڈالر خرید رہے ہیں، صرف ان افغانوں کو ڈالر مل رہا ہے جن کے پاس قانونی دستاویز ہیں۔