آئی سی سی ون ڈے ورلڈ کپ 2023 میں نیدر لینڈ نے جنوبی افریقہ کو اپ سیٹ شکست دے کر تہلکہ مچا دیا اس ہار میں اہم کردار سابق پروٹیز کھلاڑیوں کا رہا۔
بھارت میں جاری کرکٹ کے سب سے بڑے میلے آئی سی سی ون ڈے ورلڈ کپ میں دو روز قبل ورلڈ کپ جیتنے کی مضبوط امیدوار جنوبی افریقہ کو کمزور ٹیم نیدر لینڈ نے دھرما شالہ میں کھیلے گئے میچ میں 38 رنز سے اپ سیٹ شکست دے کر دنیائے کرکٹ کو حیران کر دیا اور میگا ایونٹ میں ہلچل مچا دی۔
بارش سے متاثرہ اس میچ میں نیدر لینڈ نے پہلے بیٹنگ کرتے ہوئے 43 اوورز میں 8 وکٹوں پر 245 رنز بنائے اور ہدف کا تعاقب کرنے والی جنوبی افریقہ کو 207 رنز پر قابو کر کے یہ نا قابل یقین فتح اپنے نام کی۔
نیدر لینڈ کی فتح میں اہم کردار روئیلوف وین ڈیر مروے، کولن ایکرمن اور سائبرنڈ اینجلبرڈ کا رہا لیکن کیا آپ جانتے ہیں کہ یہ تینوں کھلاڑی ماضی میں جنوبی افریقی ٹیم کا حصہ رہ چکے ہیں۔
روئیلوف وین ڈیر جنہوں نے مذکورہ میچ میں نہ صرف اہم موقع پر 19 رنز پر 29 رنز کی جارحانہ اننگ کھیلی بلکہ حریف کپتان ٹیمبا باوموا اور پروٹیز بیٹنگ لائن کے ستون رسی وینڈر جلد پویلین بھیج کر نیدر لینڈ کی فتح کے لیے راہ ہموار کی۔
یہی آل راؤنڈ کرکٹر روئیلوف 31 دسمبر 1984 میں جوہانسبرگ میں پیدا ہوئے اور سال 2006-07 میں لسٹ اے کرکٹ میں ڈیبیو کیا جبکہ 2009 اور 2011 کے درمیان جنوبی افریقہ کیلئے ایک روزہ بین الاقوامی اور ٹی 20 انٹرنیشنل کرکٹ کھیلی۔
سال 2015 میں انہوں نے نیدر لینڈز منتقل ہونے کا فیصلہ کیا اور ڈچ پاسپورٹ حاصل کیا، اسی سال آئی سی سی ورلڈ ٹی 20 کوالیفائر کیلیے ڈچ ٹیم کے اسکواڈ میں منتخب ہوئے۔
ڈچ ٹیم کے ٹاپ آرڈر بلے باز کولن ایکرمین نے اس میچ میں بنائے تو صرف 12 رنز ہی لیکن بولنگ میں کمال کرتے ہوئے کوئنٹن ڈی کوک کی اہم وکٹ حاصل کرکے جنوبی افریقہ کی بیٹنگ لائن کی کمر توڑ دی۔
آف اسپنر ایکرمن بھی 4 اپریل 1991 میں کیپ ٹاؤن میں پیدا ہوئے۔ انہوں نے اوٹینیکا پرائمری اسکول اور پورٹ الزبتھ کے گرے ہائی اسکول میں تعلیم حاصل کی اور سال 2010 میں انڈر19 ورلڈ کپ میں جنوبی افریقہ کے نائب کپتان بنے۔
میں انگلش کاؤنٹی کلب لیسٹر شائر کیلیے منتخب ہوئے اور مئی 2017 میں انہیں 2017 کرکٹ جنوبی افریقہ کے سالانہ ایوارڈز میں ڈومیسٹک پلیئرز پلیئر آف دی سیزن قرار دیا گیا، بعد ازاں یہ نیدرلینڈز منتقل ہوگئے اور اکتوبر 2019 میں ہالینڈ کیلیے بین الاقوامی کریئر کا آغاز کیا۔
انہوں نے نیدر لینڈز کیلیے ون ڈے ڈیبیو بھی 26 نومبر 2021 کو اپنی سابقہ ٹیم جنوبی افریقہ کے خلاف کیا۔
دائیں ہاتھ سے بیٹنگ کرنے والے سائبرینڈ اینجلبرچٹ جنہوں نے میچ میں 19 رنز بنائے لیکن اہم موقع پر ایک اینڈ سنبھالے رکھا وہ بھی 15 ستمبر 1988 کو جوہانسبرگ میں پیدا ہوئے۔ انہوں نے اکتوبر 2007 میں فرسٹ کلاس ڈیبیو کیا اور 2008 میں ملائیشیا میں ہونے والے انڈر19 ورلڈ کپ میں جنوبی افریقہ کی نمائندگی کی۔ بعد ازاں کلب کرکٹ کھیلنے کیلئے نیدرلینڈ منتقل ہوگئے۔
انہوں نے 2023 میں ورلڈکپ کے دوران 9 اکتوبر کو حیدرآباد میں نیوزی لینڈ کے خلاف میچ میں اپنا ون ڈے ڈیبیو کیا۔