قومی ٹیم کے اوپنر بیٹر فخر زمان کا کہنا ہے کہ نیوزی لینڈ کے خلاف پلان کے مطابق بیٹنگ کی قسمت نے بھی ساتھ دیا۔
بنگلورو کے چناسوامی اسٹیڈیم میں کھیلے گئے میچ میں نیوزی لینڈ کے خلاف پاکستان کو فاتح قرار دے دیا گیا، فخر زمان کی جارحانہ اننگز نے پاکستان کو شاندار کامیابی دلوائی، پاکستان ڈی ایل ایس میتھڈ کے تحت کیویز کو 21 رنز سے شکست دی۔
پاکستان نے ایک وکٹ کے نقصان پر 200 رنز بنائے اور جیت کے لیے 94 گیندوں پر 142 رنز درکار تھے لیکن بارش شروع ہونے پر میچ روک دیا گیا تھا۔
فخر زمان 126 اور بابر اعظم 66 رنز کے ساتھ کریز پر موجود تھے۔ فخر زمان کی جارحانہ اننگز میں 11 چھکے اور 8 چوکے شامل تھے۔
میچ کے بعد گفتگو کرتے ہوئے فخر زمان نے کہا کہ ہم جانتے ہیں ہمارے لیے ہر میچ ڈو اور ڈائی ہے، پلان کے مطابق بیٹنگ کی، قسمت نے بھی ساتھ دیا۔
فخر زمان نے کہا کہ یہ میرے کیریئر کی بہترین اننگز میں سے ایک ہے، ہر میچ میں جارحانہ اننگز کھیلنے کی کوشش ہے، جارحانہ حکمت عملی کے ساتھ ہی اگلا میچ بھی کھیلیں گے۔