فرانس کے شہنشاہ نپولین بونا پارٹ کا ایک تاریخ ہیٹ ریکارڈ 20 لاکھ 11 ہزار ڈالر ( پاکستانی کرنسی میں 57 کروڑ روپے سے زائد) قیمت میں نیلام ہوا ہے۔
غیر ملکی میڈیا کے مطابق فرانس کے شہنشاہ نپولین بوناپارٹ کا ایک سیاہ بائیکورن ہیٹ اتوار کے روز پیرس میں ایک نیلامی میں ریکارڈ 20 لاکھ گیارہ ہزار ڈالر میں فروخت ہوا۔ ہیٹ نیلام کرنے والے شخص کا دعویٰ ہے کہ نپولین کے ایسے 120 ہیٹ تھے۔
اس سیاہ ہائیکورن ہیٹ پر فرانسیسی پرچم کے رنگوں والا نیلا، سفید اور سرخ تمغہ بھی چسپاں ہے۔ اس سے پہلے یہ ٹوپی فرانسیسی تاجر ژاں لوئس نوزیز کی ملکیت تھی جن کا گزشتہ برس انتقال ہو گیا تھا۔
رپورٹ کے مطابق ڈروٹ نیلامی گھر میں فروخت ہونے والے اس ہیٹ کی بولی شروع میں 6 سے 8 لاکھ یورو تک کی قیمت لگنے کی امید تھی تاہم خریدار نے اس کی بولی امید سے کہیں زیادہ لگائی۔
پیرس کے جنوب میں فونٹین بلیو میں واقع نیلامی گھر نے اس ٹوپی کے خریدار کی شناخت ظاہر نہیں کی ہے۔
نیلامی گھر کے ایک اہلکار نے بتایا کہ آخری بار نپولین کا ایک اور ہیٹ 2014 میں جنوبی کوریا کے ایک تاجر نے 1,884,000 یورو میں خریدا تھا اس طرح اس بار نیلامی میں سابقہ ریکارڈ بھی ٹوٹ گیا ہے۔
نیلام کرنے والے ژاں پیئر اوسنٹ نے خبر رساں ادارے روئٹرز کو بتایا کہ یہ ہیٹ نپولین کے لیے ایک ٹریڈ مارک حیثیت رکھتا تھا اور وہ اپنی زندگی میں ایسی 120 ٹوپیوں کے مالک تھے اور یہ ٹوپی اس تصویر کا حصہ ہے جو انہوں نے اپنے لیے تخلیق کی تھی۔
انہوں نے یہ بھی کہا کہ نپولین ہیٹ کو اس طرح پہنتے تھے کہ اس کے کونے ہمیشہ ان کے کندھوں کے ساتھ مطابقت رکھتے تھے، جب کہ اس دور میں بیشتر لوگ اس کے کونے آگے اور پیچھے کی جانب رکھ کر پہنتے تھے۔
پولین کے ہیٹ اکثر نیلام ہوتے رہتے ہیں۔ اکتوبر 2021 میں ان کی دریافت ہونے والی ایک اور ٹوپی لندن کے بونہمس میں نیلام کی گئی تھی، جو ڈی این اے کے اس ثبوت کے ساتھ تھی کہ یہ ٹوپی نپولین کی ہی ہے۔
واضح رہے کہ فرانسیسی انقلاب کے دوران نپولین ایک نمایاں شخصیت تھی۔ 1804 شہنشاہ کے طور پر خدمات سر انجام دینے سے پہلے، انہوں نے قونصل کی حیثیت سے بھی کام کیا اور شہنشاہیت کے قیام کے بعد یورپ کے بیشتر حصوں میں فوجوں کی قیادت کی۔
نپولین بونا پارٹ کی زندگی پر مبنی فلم ایک نئی فلم چند دنوں میں ہی سینما گھروں کی زینت بننے والی ہے، جس میں اداکار جوکوئن فینکس نپولین کا کردار ادا کر رہے ہیں۔