سال میں چار موسم سردی گرمی خزاں بہار ہوتے ہیں بارش اور برفباری ان ہی موسموں سے جُڑے ہیں لیکن دنیا میں کچھ ملک ایسے بھی نہیں جہاں آج تک برف باری نہیں ہوئی۔
ہماری زمین پر سردی، گرمی، خزاں اور بہار کے موسم ہوتے ہیں اور ہر موسم کی اپنی افادیت ہے لیکن ان سے جڑے برسات اور برفباری کے موسم بھی ہوتے ہیں جس سے تقریباً ہر شخص ہی لطف اندوز ہوتا ہے۔ پاکستان وہ ملک ہے جہاں یہ سب موسم ہوتے ہیں جب کہ دنیا کے کئی خطے تو ایسے ہیں جو سارا سال برف میں ڈھکے رہتے ہیں لیکن کیا آپ جانتے ہیں کہ دنیا میں کئی ممالک ایسے بھی ہیں جہاں آج تک برف باری نہیں ہوئی ہے۔
اگر نہیں جانتے تو ہم آپ کی معلومات میں اضافہ کرتے ہیں اور آپ کو بتاتے ہیں کہ دنیا کے وہ کون کون سے ملک ہیں جہاں کبھی برف نہیں گری اور وہاں کے شہریوں کو برفباری کا نظارہ کرنے کے لیے دوسرے ملک جانا پڑتا ہے۔
برازیل:
برازیل جنوبی امریکا کا سب سے بڑا ملک ہے۔ اس کے ایمیزون بیسن میں ایک وسیع استوائی جنگل، منفرد جنگلی حیات کا گھر، مختلف قسم کے ماحولیاتی نظام، اور متعدد محفوظ رہائش گاہوں پر پھیلے وسیع قدرتی وسائل شامل ہیں۔ یہ ملک اپنے گرم و مرطوب موسم اور گھننے جنگلوں کے سبب مشہور ہے لیکن یہ ملک بھی برفباری کے موسم سے محروم ہے اور یہاں کے باشندے آج تک اپنے ملک کو سفید چادر سے ڈھکا ہوا نہیں دیکھ سکے ہیں۔
جمائیکا:
کیربیئن کا جزیرے نما ملک جمائیکا، امریکا کے شمال مشرق میں واقع ہے جو جنگلی حیوانات کی پناہ گاہ کہلایا جاتا ہے۔ اس ملک کا موسم گرم ہے جہاں بارش بھی ہوتی ہے اور نمی کا تناسب بھی زیادہ ہے۔ گرم موسم کے سبب اس ملک میں آج تک برفباری نہیں ہوئی اور اسی سبب جمائیکا کے باشندے برفباری سے لطف اندوز ہونے کیلئے دوسرے ممالک کی جانب سفر کرتے ہیں۔
نائیجیریا:
مغربی افریقہ میں واقع ایک اسلامی ملک نائیجیریا خط استوا کے قریب تر ہے، اس ملک کا موسم بھی گرم و مرطوب ہے جہاں بارش تو ضرور ہوتی ہے لیکن اس ملک میں بھی برفباری کبھی نہیں ہوئی۔
انڈونیشیا:
ایشیا اور آسٹریلیا کے درمیان ہزاروں جزائر پر مشتمل انڈونیشیا کا موسم گرم ہے جہاں بارش بھی ہوتی ہے اور نمی کا تناسب بھی زیادہ ہے۔ اس ملک میں زلزلے آتے رہتے اور آتش فشاں پھٹتے رہتے ہیں۔ اپنے خوبصورت قدرتی نظاروں کی وجہ سے یہ ملک سیاحوں کے لیے کشش کا باعث ہے لیکن یہاں برفباری نہیں ہوتی۔ اس لیے اس ملک کے رہائشی برفباری دیکھنے کے لیے کسی اور برفیلے ملک کا رخ کرتے ہیں۔
سنگاپور:
خطہ استوا کے قریب واقع ملک سنگاپور گرم و مرطوب موسم کا حامل ہے جہاں کے باشندے نمی، گرمی اور بارشوں کے عادی ہیں۔ سنگاپور حسین و دل موہ لینے والے بے شمار قدرتی مناظر سے مالامال ضرور ہے لیکن اس ملک میں بھی برفباری نہیں ہوتی اور یہاں کے باشندوں کے لیے اپنے ملک میں برفباری دیکھنے کا تصور کوئی حیران کن خواب دیکھنے کے مترادف ہے۔
تھائی لینڈ:
تھائی لینڈ اپنے ساحلوں کے سبب مشہور ہے، اس ملک کا موسم گرم و مرطوب ہے اور پورے سال ہی یہاں گرمی رہتی ہے۔ یہ ملک بھی آسمان سے برستے برف کے گالوں سے محروم ہے۔
مالدیپ:
برِصغیر کے جنوب میں گول جزیروں کے حسین امتزاج پر مشتمل ملک مالدیپ واقع ہے جس کو قدرتی خوبصورتی کے باعث مشہور تاجر مارکو پولو نے ’فلاور آف انڈیز‘ کا لقب دیا تھا۔
خوبصورتی سے سرشار یہ ملک سیاحوں کی اولین ترجیح بن چکا ہے لیکن یہ ملک برفباری جیسی نعمت سے محروم ہے اور مالدیپ میں سیاح برفباری نہیں بلکہ یہاں نیلے سمندر کے حسین و دل موہ لینے والے مناظر سے لطف اندوز ہونے جاتے ہیں۔
بنگلہ دیش:
بنگلہ دیش جنوبی ایشیا کا ایک ملک ہے۔ اس ملک میں سال کے چھ موسم شمار کیے جاتے ہیں۔ موسمِ گرما، ہواؤں کا موسم، خزاں، خزاں کا آخری حصہ، موسمِ سرما اور بہار۔ بنگلہ دیش کا موسم گرم و مرطوب ہے جہاں طوفانوں کا خطرہ ہر لمحے رہتا ہے لیکن اس ملک میں آج تک برفباری نہیں ہوئی اور نہ ہی مستقبلِ قریب میں اس کے آثار ہیں۔
قطر:
ماضی میں ماہی گیروں اور موتی جمع کرنے والوں کی بستی کہلایا جانے والا ملک قطر کا شمار دنیا کے گرم ممالک کی فہرست میں ہوتا ہے جہاں برفباری کا تصوّر تاحال ایک خواب ہی ہے۔