دوحہ: نگراں وزیر آئی ٹی ڈاکٹر عمر سیف کا کہنا ہے کہ پاکستانی آئی ٹی کمپنیاں قطرمیں ڈیجیٹل ٹیکنالوجی کے فروغ کیلئے سنگ میل بن سکتی ہیں۔
تفصیلات کے مطابق قطرمیں پاکستانی آئی ٹی کمپنیوں کی شاندارپذیرائی ہوئی اور دو طرفہ ٹیکنالوجی امور پر مثبت پیش رفت سامنے آئی۔
نگراں وزیر آئی ٹی ڈاکٹر عمر سیف کی قیادت میں وفد نے دوحہ میں منعقدہ پاک قطر آئی ٹی کانفرنس میں شرکت کی، وفد میں اسپیشل انویسٹمنٹ فیسلی ٹیشن، پاکستان سافٹ ویئر ایکسپورٹ بورڈ کے نمائندگان شامل تھے۔
پاکستان سافٹ ویئر ہاؤسز ایسوسی ایشن کے چیئرمین زوہیب خان سمیت 30 آئی ٹی کمپنیوں نے بھی شرکت کی۔
ڈاکٹر عمر سیف نے کہا کہ کانفرنس کا مقصد سرمایہ کاروں اور کمپنیوں کے درمیان تعلقات کا فروغ ہے، قطری حکام اور بزنس گروپس سے ملاقاتیں جاری اور نتائج نہایت حوصلہ افزا ہیں۔
نگراں وزیر آئی ٹی کا کہنا تھا کہ پاکستانی آئی ٹی کمپنیاں قطرمیں ڈیجیٹل ٹیکنالوجی کے فروغ کیلئے سنگ میل بن سکتی ہیں، دونوں ممالک کے ڈیجیٹل تکنیکی ماحولیاتی نظام کو نئی بلندیوں تک لے جایا جاسکتا ہے۔
انھوں نے مزید کہا کہ 30 ہزار آئی ٹی کمپنیاں پاکستان کو ڈیجیٹل ورلڈ سے منسلک کرنے کیلئے بھرپورکردارادا کررہی ہیں، سالانہ 75 ہزار آئی ٹی گریجویٹس تیار ہورہے، عالمی معیار کی تربیت فراہمی کیلئے اقدامات کررہے، پاکستان کے آئی ٹی ہنر مند اور کمپنیاں عالمی طور پر تسلیم شدہ ہیں۔