اسلام آباد : الیکشن کمیشن نے بانی پی ٹی آئی کی نا اہلیت کے کیس کا فیصلہ محفوظ کرلیا، وکیل شعیب شاہین نے بتایا انٹرا پارٹی الیکشن کا ریکارڈ جمع کرادیا کیس ختم ہونا چاہیے۔
تفصیلات کے مطابق الیکشن کمیشن میں بانی پی ٹی آئی کو پارٹی عہدے سے ہٹانے سے متعلق کیس کی سماعت ہوئی، چیف الیکشن کمشنر سکندرسلطان کی سربراہی میں5 رکنی بینچ نے سماعت کی۔
بانی پی ٹی آئی کے وکیل شعیب شاہین اور پٹیشنر خالد محمود ایڈوکیٹ الیکشن کمیشن میں پیش ہوئے ، وکیل شعیب شاہین نے بتایا کہ ہم نے انٹر پارٹی انتخابات کا ریکارڈ الیکشن کمیشن میں جمع کرادیا، اب اس کیس کو ختم ہوجانا چاہیے۔
بانی چیئرمین پی ٹی آئی کے وکیل کا کہنا تھا کہ قانونی طور پر یہ معاملہ ختم ہوگیا کیونکہ پارٹی کا نیا چیئرمین آگیا ہے، آپ کیس چلانا چاہتے ہیں تو اکبر ایس بابر پٹیشن دائر کررہےہیں اسکےساتھ چلالیں۔
جس پر چیف الیکشن کمشنر نے کہا کہ آپ خالد محمود کو موقع دے رہے کہ وہ نئے چئیرمین کیخلاف بھی پٹیشن کریں۔
پٹیشنر خالد محمود ایڈوکیٹ نے کہا کہ پی ٹی آئی کے انٹر پارٹی انتخابات کو کسی نے تسلیم نہیں کیا، پی ٹی آئی بانی ممبر اکبر ایس بابر نےبھی انٹر پارٹی الیکشن کو تسلیم نہیں کیا، آپ آرڈر میں لکھ دیں بانی چیئرمین سزا یافتہ ہیں وہ عہدہ رکھ نہیں سکتے۔
چیف الیکشن کمشنر کا کہنا تھا کہ بانی چیئرمین پی ٹی آئی نے الیکشن لڑا ہی نہیں اس میں ہم کچھ نہیں کہہ سکتے ، جس کے بعد الیکشن کمیشن نے بانی چیئرمین پی ٹی آئی کی نا اہلیت کےکیس کافیصلہ محفوظ کرلیا۔