راولپنڈی : کثیر الملکی مشترکہ اسپیشل فورسز کی مشقیں فجر الشرق پنجم اختتام پذیر ہوگئیں، اختتامی تقریب میں پاکستان، بحرین، عراق اور کویت کی اسپیشل فورسز کے دستوں نے اپنی پیشہ وارانہ مہارت کا مظاہرہ کیا۔
تفصیلات کے مطابق پاک فوج کے شعبہ تعلقات عامہ(آئی ایس پی آر) کی جانب سے بیان میں کہا گیا ہے کہ کثیر الملکی مشترکہ اسپیشل فورسز کی مشقیں فجر الشرق پنجم کی اختتامی تقریب نیشنل کاؤنٹر ٹیررازم سینٹر پبی میں منعقد ہوئی۔
اختتامی تقریب میں شریک ممالک کے دستوں کے علاوہ افسران بھی موجود تھے، مشقوں میں پاکستان، بحرین، عراق اور کویت کی اسپیشل فورسز کے دستوں نے حصہ لیا، دو ہفتے جاری رہنے والی مشق کا آغاز 27 نومبر 2023 کو ہوا۔
تقریب میں انسداد دہشت گردی کے حوالے سے مشقیں کی گئیں، مشق کرنے والے فوجیوں کے علاوہ برادر ممالک بحرین، عراق اور کویت کے افسران نے بھی اختتامی تقریب کا مشاہدہ کیا۔
شرکاء ممالک کی اسپیشل فورسز نے آخری روز اپنی پیشہ وارانہ مہارت کا مظاہرہ کیا، اس مشق کا مقصد برادر ممالک کے درمیان تاریخی فوجی تعلقات کو مزید تقویت دینا اور انسداد دہشت گردی کے خلاف مشترکہ کوششوں کو فروغ دینے سمیت مستقبل کے فوجی تعاون کے لئے باہمی دلچسپی کے شعبوں کی نشاندہی کرنا تھا۔