پیپلز پارٹی کے بلوچستان کے ایک الیکٹیبل سے معاملات طے پا گئے

کوئٹہ: پاکستان پیپلز پارٹی کے بلوچستان سے تعلق رکھنے والے ایک الیکٹیبکل مٹھا خان کاکڑ سے معاملات طے پا گئے۔

ذرائع نے بتایا کہ بلوچستان کے سابق وزیر مٹھا خان کاکڑ نے پیپلز پارٹی میں شمولیت کا فیصلہ کر لیا، وہ جلد یہ اس کا باضابطہ اعلان کریں گے، ان کی پی پی قیادت سے ملاقات ہو چکی ہے۔

سابق صوبائی وزیر مٹھا خان کاکڑ کا تعلق بلوچستان عوامی پارٹی سے ہے۔ وہ 2018 میں ژوب سے رکن بلوچستان اسمبلی منتخب ہوئے تھے۔

متعلقہ: سرفراز بگٹی کا پیپلز پارٹی میں شامل ہونے کا فیصلہ

گزشتہ روز ذرائع نے اے آر وائی نیوز کو بتایا تھا کہ بلوچستان کے دو بڑے الیکٹیبلز نے پیپلز پارٹی میں شمولیت سے معذرت کر لی تھی۔

سردار صالح بھوتانی اور جان محمد جمالی نے پارٹی میں شمولیت سے معذرت کی تھی۔ اس حوالے سے ذرائع کا کہنا تھا کہ یار محمد رند نے مبینہ طور پر خود کو بلوچستان کا وزیر اعلیٰ بنانے اور ساتھ ہی اپنے بیٹے کیلیے سندھ اسمبلی میں کنفرم سیٹ کا مطالبہ کیا تھا۔

ذرائع کے مطابق پیپلز پارٹی نے ان کی یہ شرائط قبول کرنے سے انکار کر دیا تھا جس کے بعد یار محمد رند نے پیپلز پارٹی میں شمولیت سے معذرت کی تھی۔