فلم ’ڈنکی‘ کی ریلیز کے ساتھ ہی بالی وڈ کنگ شاہ رخ خان نے سال 2023 میں کامیابی کی ہیٹرک مکمل کرلی۔
بھارتی سپراسٹار کے لیے یہ سال بہت ہی خوش کن رہا جہاں انھوں نے دو بلاک بسٹر فلمیں پٹھان اور جوان دیں۔ دنوں فلموں نے ہی پہلے دن بھارتی باکس آفس پر 50 کروڑ سے زیادہ کی کمائی کی تھی۔ آج ریلیز ہونے والی فلم ڈنکی نے بھی باکس آفس پر کامیابی کے جھنڈے گاڑ دیے ہیں۔
ویک اینڈ یا چھٹی کا دن نہ ہونے کے باوجود فلم نے پہلے دن جمعرات کو تقریباً 30 سے 35 کروڑ روپے کے درمیان کمائی کی ہے۔
شائقین کو شاہ رخ خان اور راجکمار ہیرانی کے اشتراک کا بے صبری سے انتظار تھا۔ بہت سے فلمی شائقین کافی خواہشمند تھے کہ بھارتی فلمی صنعت کے دو بڑے ایک ساتھ فلم بنائیں۔
اگرچہ شاہ رخ کی پٹھان اور جوان نے باکس آفس پر شاندار کمائی کی ہے لیکن شائقین کو توقع ہے کہ ڈنکی کمائی کے لحاظ سے ان دونوں فلموں کو ٹکر ضرور دے گی۔
فلمی ماہرین کے مطابق جمعرات کے عام دن میں ڈنکی کا 35 یا 40 کروڑ کا بزنس ایک اچھی شروعات ہے۔ تاہم اس کے بعد جو چیز فلم کے لیے سب سے اہم ثابت ہوگی وہ شائقین اور ماہرین کی آرا ہوگی۔
واضح رہے کہ فلم ’ڈنکی‘ کی کہانی چار دوستوں کے گرد گھومتی ہے جو غیرقانونی طور پر بیرون ملک سفر کرتے ہیں، ’ڈنکی‘ محبت اور دوستی کی کہانی ہے جسے جذباتی مناظر اور کامیڈی کے ساتھ اسکرین پر پیش کیا گیا ہے۔
فلم میں بالی وڈ کنگ کے ہمراہ ساؤتھ کی معروف اداکارہ تاپسی پنوں مرکزی کردار میں موجود ہیں۔ اس کے علاوہ وکی کوشل اور بومن ایرانی جیسے بہترین اداکار بھی فلم کا حصہ ہیں۔