پاک آسٹریلیا تین ٹیسٹ میچوں کی سیریز کے میلبرن میں کھیلے جا رہے دوسرے ٹیسٹ کے پہلے دن کا کھیل ختم ہوگیا آسٹریلیا نے 3 وکٹوں پر 187 رنز بنا لیے ہیں۔
پاکستان اور آسٹریلیا کے درمیان تین ٹیسٹ میچوں پر مشتمل بینو قادر ٹرافی سیریز کے میلبرن میں کھیلے جا رہے دوسرے ٹیسٹ میچ کے پہلے دن کا کھیل ختم ہو گیا۔ بارش کے باعث صرف 66 اوورز کا کھیل ہی ہوسکا۔ دن کے اختتام تک میزبان آسٹریلیا نے تین وکٹوں کے نقصان پر 187 رنز بنا لیے تھے۔
باکسنگ ڈے ٹیسٹ میں قومی کپتان شان مسعود نے ٹاس جیت کر پہلے فیلڈنگ کا فیصلہ کیا۔ آسٹریلیا کی جانب سے اننگ کا آغاز ڈیوڈ وارنر اور عثمان خواجہ نے کیا اور ٹیم کے لیے 90 رنز کی اوپننگ پارٹنر شپ قائم کی۔ اس موقع پر آغا سلمان نے ڈیوڈ وارنر کو بابر اعظم کے ہاتھوں کیچ آؤٹ کرا کے شاہینوں کو پہلی کامیابی دلائی۔
آسٹریلیا کے مجموعی اسکور میں 18 رنز کا اضافہ ہونے کے بعد دوسرے اوپنر عثمان خواجہ بھی پویلین لوٹ گئے۔ انہیں حسن علی نے میدان بدر کیا۔ دوسرے سیشن میں کینگروز کا مجموعی اسکور 114 پر پہنچا تھا کہ بارش شروع ہو گئی جس کے باعث دوسرے سیشن کا کھیل نہ ہوسکا۔
بارش رکنے کے بعد تیسرے سیشن میں کھیل کا پھر آغاز ہوا اور پہلے دن کے اختتام تک آسٹریلیا نے تین وکٹوں کے نقصان پر 187 رنز بنا لیے تھے۔ تیسرے آؤٹ ہونے والے بیٹر اسٹیو اسمتھ تھے جنہوں نے 26 رنز اسکور کیے۔ مارنس لبوشین 44 اور ٹریوس ہیڈ 10 رنز بنا کر کریز پر موجود ہیں۔
پاکستان کی جانب سے حسن علی، سلمان علی آغا اور عامر جمال نے ایک ایک وکٹ حاصل کی ہے۔ پرتھ کی طرح میلبرن میں بھی قومی ٹیم کی جانب سے ناقص فیلڈنگ کا مظاہرہ جاری ہے۔ شاہین شاہ آفریدی کی گیند پر عبداللہ شفیق نے وارنر کا آسان کیچ ڈراپ کر دیا۔
میلبرن کرکٹ اسٹیڈیم میں آسٹریلیا کا پاکستان کے خلاف پلڑا بھاری ہے۔ دونوں ٹیموں نے اس میدان میں 10 ٹیسٹ میچز کھیلے ہیں جن میں سے میزبان نے 6 اور قومی ٹیم نے دو میں کامیابی حاصل کی ہے جب کہ دو میچز ڈرا رہے۔
واضح رہے کہ آسٹریلیا نے پاکستان کو پرتھ ٹیسٹ میں 360 رنز کے بھاری مارجن سے شکست دی تھی اور میزبان ٹیم کو سیریز میں ایک صفر کی برتری حاصل ہے۔ یہ ٹیسٹ سیریز آئی سی سی ٹیسٹ چیمپئن شپ 2025 سائیکل کا حصہ ہے۔