کرسمس کے موقع پر برطانوی شاہی خاندان میں ہر سال خصوصی ضیافت ہوتی ہے تاہم سابق شاہی شیف نے اسے بورنگ مینیو قرار دے دیا ہے۔
کرسمس کا تہوار دنیا بھر میں جوش وخروش کے ساتھ منایا جاتا ہے۔ اس موقع پر برطانیہ کے شاہی خاندان کی جانب سے بھی خصوصی ضیافت کا اہتمام کیا جاتا ہے جس میں انواع واقسام کے کھانے ہوتے ہیں تاہم شاہی خاندان کے ایک سابق شیف ڈیرن میکگریڈی نے شاہی خاندان کے کرسمس مینیو کو بورنگ ضیافت قرار دیا ہے۔
61 سالہ ڈیرن میکگریڈی جو آنجہانی ملکہ برطانیہ الزبتھ دوم اور شہزادی ڈیانا کے دور میں خدمات انجام دے چکے ہیں اور 7 سال تک کرسمس عشایے کے انتظامات سنبھال چکے ہیں اب برسوں بعد انہوں نے شاہی ضیافت کو بورنگ قرار دیتے ہوئے اس راز سے بھی پردہ اٹھایا ہے کہ اس دعوت میں شاہی خاندان کے تمام مَردوں کے لیے الگ اور خواتین کے لیے الگ مینو تیار کیا جاتا ہے۔
غیر ملکی میڈیا کے مطابق ڈیرن کا کہنا ہے کہ کسی بھی تہوار کے موقع پر شاہی خاندان کے افراد کے لیے روایتی کھانوں سے میز سجائی جاتی ہے، جو توقع کے برعکس انتہائی سادہ ہوتی ہے۔ یہ بالکل ویسی ہی ہوتی ہے جیسی بہت سے برطانوی گھروں میں ہوتی ہے۔
شاہی خاندان کے سابق شیف کے مطابق جب تہوار کا موسم آتا ہے تو شاہی خاندان اپنی روایت پر قائم رہتا ہے اور اپنے مینو کو تبدیل نہیں کرتا اور ہر سال ان کا کم و بیش ایک ہی مینو رہتا ہے۔
تاہم ان کا کہنا ہے کہ شاہی خاندان کی ایک عجب روایت ہے کہ ان کے تمام مردوں اور تمام خواتین کے لیے الگ الگ ناشتہ کا اہتمام کیا جاتا ہے۔
ان کے مردوں کے لیے مکمل انگریزی ناشتہ جس میں انڈے، نمکین گوشت، مشروم، خاص مچھلی(کیپرز)، بھُنے ہوئے گردے شامل ہیں جبکہ شاہی خواتین کے لیے ہلکے پھلکے ناشتے کا اہتمام کیا جاتا ہے جس میں پھل، آدھا گریپ فروٹ، ٹوسٹ اور کافی شامل ہوتی ہے۔ ناشتے کے بعد شاہی خاندان گرجا گھر روانہ ہوجاتا ہے۔
سابق شیف کے مطابق ہر سال ایک ہی طرح کے کھانے کا اہتمام کیا جاتا ہے اور عشائے میں شاہی خاندان اور کام کرنے والے عملے کے لیے ترکی (سالم مرغی سے تیار کردہ پکوان) ، روسٹ آلو، گاجر، پیاز، شاہ بلوط، مختلف اقسام کی چٹنی کو روٹی کے ساتھ پیش کیا جاتا ہے جبکہ میٹھے میں پڈنگ اور مشروبات میں کاک ٹیل شامل ہوتا ہے۔