حکومت پاکستان نے آئی ایم ایف کی ایک اور شرط پوری کرتے ہوئے توانائی شعبے کے گردشی قرض میں کمی کے لیے 400 ارب روپے جاری کرنے کا فیصلہ کیا ہے۔
اے آر وائی نیوز کے مطابق رواں مالی سال کے اختتام تک گردشی قرضوں میں 400 ارب کمی آئی ایم ایف بنچ مارک میں شامل ہے اور حکومت پاکستان نے عالمی مالیاتی ادارے کی اس طرط کو پورا کرتے ہوئے توانائی شعبے کے گردشی قرض میں کمی کے لیے 400 ارب روپے جاری کرنے کا فیصلہ کیا ہے۔
وزارت خزانہ کی دستاویز کے مطابق جون 2024 تک مجموعی طور پر حکومتی پاور پلانٹس کو 260 ارب اور کے الیکٹرک کو 140 ارب جاری کرنے ہیں۔
وزارت خزانہ نے ابتدائی طور پر حکومتی پاور پلانٹس کو 140 ارب روپے اور کے الیکٹرک کو 57 ارب روپے جاری کر رہی ہے۔
ذرائع کا کہنا ہے کہ 197 ارب میں سے 70 ارب حکومتی پاور پلانٹس سے قرض واپس لیا جائے گا جب کہ گیس سیکٹر کے گردشی قرضے میں کمی کیلیے 65 ارب گیس کمپنیوں کو ملیں گے۔ گیس کمپنیوں کی جانب سے رقم ملنے پر پاکستان پٹرولیم لمیٹڈ ڈیویڈنڈ کی رقم ادا کرے گا۔
ذرائع کے مطابق وزارت خزانہ کی ہدایات پر توانائی شعبے کے گردشی قرضے میں 200 ارب کمی کی جائے گی۔