لبنان کے دارالحکومت بیروت میں اسرائیل کے ڈرون حملے میں حماس رہنما صالح العاروری کی شہادت کے بعد مغربی کنارے کے شہر رام اللہ میں ہزاروں افراد سڑکوں پر نکل آئے اور احتجاج کیا۔
غیر ملکی ذرائع ابلاغ کے مطابق فلسطینیوں نے رام اللہ میں آج مکمل ہڑتال کی کال دے دی ہے، رام اللہ کا العرورہ قصبہ شہید صالح العاروری کا آبائی علاقہ ہے۔
دوسری جانب لبنان میں اسرائیلی حملے میں حماس رہنما صالح العروری کی شہادت پر ایران نے کہا ہے کہ حماس رہنماء کی شہادت سے اسرائیل کے خلاف مزاحمت میں مزید اضافہ ہوگا۔
غیر ملکی ذرائع ابلاغ کے مطابق ترجمان ایرانی وزارت خارجہ نے اس حوالے سے کہا ہے کہ اسرائیلی حملہ لبنان کی خود مختاری کی خلاف ورزی ہے۔ فلسطینی تحریک میں حماس رہنما کے قتل کے بعد نئی جہت پیدا ہوگی۔
اسرائیل کا حماس رہنما پر حملے کی ذمہ داری قبول کرنے سے انکار
حملے کی مذمت کرتے ہوئے لبنان کے وزیراعظم نجیب میقاتی کا کہنا تھا کہ اسرائیل غزہ میں ناکامی کے بعد لبنان کو محاذ آرائی کے نئے مرحلے میں لے جانا چاہتا ہے۔