دنیا کے سرد ترین مقام قطب جنوبی میں سعودی عرب کا پرچم لہرا دیا گیا ہے اور یہ اعزاز سعودہ مہم جو بدر الشیبانی نے حاصل کیا ہے۔
غیر ملکی میڈیا کے مطابق دنیا کے سرد ترین علاقے قطب جنوبی جہان ان دنوں درجہ حرارت نقطہ انجماد سے 50 ڈگری نیچے ہے۔ اتنے سخت موسم میں سعودی مہم جو بدر الشیبانی 111 کلومیٹر کی طویل مسافت برف پر اسکیٹنگ کر کے طے کی اور قطب جنوبی کے زیرو پوائنٹ پر پہنچے جہاں انہوں نے اپنے ملک کا پرچم لہرانے کا اعزاز حاصل کیا۔
رپورٹ کے مطابق بدر الشیبانی کو قطب جنوبی کے زیرو پوائنٹ پہنچنے میں مشکل حالات کا سامنا کرنا پڑا۔ ان کے ساتھ 60 کلو گرام وزنی سامان بھی موجود تھا جب کہ یخ بستہ تیز ہوائیں ان کی راہ میں رکاوٹ بنی رہیں جس کی وجہ سے ان کا سفر کٹھن ہوا۔
تاہم سعودی مہم جو تمام رکاوٹوں کو عبور کرتے ہوئے کامیابی سے زیرو پوائنٹ پہنچے اور وہاں اپنے ملک کا پرچم نصب کیا۔
واضح رہے قطب جنوبی کا زیرو پوائنٹ سطح سمندر سے 2800 میٹر بلند ہے جہاں آکسیجن کی مقدار بھی بہت کم ہو جاتی ہے جس کی وجہ سے وہاں سانس لینا بھی انتہائی دشوار ہوتا ہے۔