ایک شخص وزیر اعظم بنا تو سب کچھ بدل گیا، لوگوں نے تعریفیں شروع کر دیں: جہانگیر ترین

لودھراں: پیٹرن ان چیف استحکام پاکستان پارٹی جہانگیر ترین کا بانی پی ٹی آئی کو تنقید کا نشانہ بناتے ہوئے کہنا ہے کہ ایک شخص وزیر اعظم بنا تو سب کچھ بدل گیا۔

جہانگیر ترین نے سابق تحصیل ناظم سید اصغر شاہ گیلانی سمیت لودھراں میں مختلف شخصیات سے ملاقاتیں کیں۔ اس موقع پر امیدوار پی پی 228 نذیر خان بھی ان کے ہمراہ تھے۔ انہوں نے پارٹی رہنماؤں اور کارکنوں سے بھی ملاقاتیں کیں۔

پیٹرن ان چیف آئی پی پی کا کہنا تھا کہ لودھراں کے لوگوں نے مجھے پناہ عزت دی ہے اور میرا فرض ہے یہاں کے عوام کی خدمت کے ذریعے ان کا قرض چکاؤں، میری عمر کے ساتھ ساتھ کام کرنے کا جذبہ بھی بڑھ گیا ہے۔

انہوں نے کہا کہ عوام نے کامیاب کیا تو پورے پاکستان میں ترقی یافتہ لودھراں کا نام ہوگا۔

آئی پی پی بنانے کی وجہ بتاتے ہوئے جہانگیر ترین نے کہا کہ نئی پارٹی اس لیے بنائی کیونکہ 10، 12 سال ایک جماعت کیلیے دن رات کام کیا مگر جب وہ لیڈر صاحب وزیر اعظم بنے تو سب کچھ بدل گیا۔

جہانگیر ترین نے کہا کہ وزیر اعظم کی کرسی پر بیٹھتے ہی لوگوں نے ان کی تعریفوں کے پُل باندھنا شروع کر دیے، وزیر اعظم کی کرسی خطرناک چیز ہے اس میں بادشاہ سمجھتا ہے میں ہی سب کچھ ہوں۔

ان کا کہنا تھا کہ لوگ عوام کو بھی بھول جاتے ہیں جو عوام انہیں وزیر اعظم بناتی ہے، اب ہمیں ملک کا سوچنا ہے کیونکہ پاکستان ترقی کرے گا تو لودھراں اور عوام ترقی کریں گے۔

جہانگیر ترین نے کہا کہ ملک ایسے نہیں چلتے جیسے گزشتہ ادوار میں چلائے گئے، معیشت مظبوط اور نوجوانوں کو نوکریاں فراہم کرنا ہماری پہلی ترجیح ہوگی، دنیا میں پاکستان کی عزت ہونی چاہیے ہمیں ملک کیلیے سوچنا ہوگا۔