مظلوم اور نہتے فلسطینیوں پر غاصب اسرائیل کے مظالم پر دنیا کے ہر فورم پر آواز اٹھائی جا رہی ہے گزشتہ روز قطر میں فٹبال اسٹیڈیم فلسطینیوں کے حق میں نعروں سے گونج اٹھا۔
مظلوم اور نہتے فلسطینیوں پر غاصب اسرائیل کے مظالم پر دنیا کے ہر فورم پر آواز اٹھائی جا رہی ہے۔ صرف کھیل کے میدان ہی نہیں بلکہ امریکا سمیت دنیا کے بیشتر ممالک میں آزاد فلسطین کی حمایت اور اسرائیلی جارحیت کے خلاف احتجاجی مظاہرے کیے جا رہے ہیں جن میں غزہ میں فوری مستقل جنگ بندی کا مطالبہ کیا جا رہا ہے۔
غیر ملکی میڈیا کے مطابق جمعرات کو قطر میں جاری ایشین کپ میں یو اے ای اور فلسطین کی ٹیموں کے خلاف مقابلے میں اسٹیڈیم ایک بار بھر مظلوم فلسطینیوں کی حمایت میں لگائے جانے والے نعروں سے گونج اٹھا اور شائقین نے با آواز بلند ایک آواز میں آزاد، آزاد فلسطین کے نعرے لگائے۔
متحدہ عرب امارات کے خلاف فلسطینی فٹبال ٹیم کے مقابلے کے دوران اسٹیڈیم میں غزہ میں اسرائیلی جارحیت سے ہونے والے قیمتی جانی نقصان پر اظہار افسوس کے لیے کِک آف پلے سے قبل خاموشی بھی اختیار کی گئی اور دونوں ٹیمیں خاموشی کے ساتھ قطار میں کھڑی ہو گئیں۔ میچ شروع ہونے سے قبل فلسطینی کھلاڑیوں نے قومی ترانے کے بعد شائقین کو تالیاں بجا کر داد بھی دی جس کے بعد باقاعدہ مقابلہ شروع ہوا۔
تاہم میچ شروع ہونے سے قبل الجنوب اسٹیڈیم کے اردگرد بلند آواز کے ساتھ نعرے لگنا شروع ہو گئے تھے خاموشی کے دوران لگانا بھی بند کر دیے گئے تاہم اس کے بعد اسٹیڈیم پھر ان ہی نعروں سے گونجتا رہا۔
واضح رہے کہ اس سے قبل گزشتہ اتوار کو ایران کے خلاف فلسطینی ٹیم کے مقابلے میں بھی اسی طرح کے نعرے لگائے گئے تھے۔