آج ملک کے شمالی علاقوں میں موسم شدید سرد رہے گا جب کہ پنجاب میں بھی سردی کی شدت برقرار اور دھند میں اضافے کا امکان ہے۔
آج ملک کے شمالی علاقوں میں موسم شدید سرد رہے گا۔ لہہ میں پارہ منفی 12 جب کہ اسکردو میں منفی 9 تک گرنے کا امکان ہے۔ شمالی بلوچستان میں بھی موسم شدید سرد رہے گا جب کہ اسلام آباد، پنجاب، خیبر پختونخوا کے میدانی علاقوں اور بالائی سندھ میں سردی کے ساتھ دھند اور اسموگ چھائے رہنے کا امکان ہے۔
محکمہ موسمیات نے آئندہ چوبیس گھنٹوں کے دوران کوئٹہ، لاہور، اسلام آباد، پشاور سمیت ملک کے بیشتر علاقوں میں موسم سرد اور خشک رہنے کی پیشگوئی کی ہے جب کہ کشمیر اور گلگت بلتستان میں بھی موسم سرد اور مطلع ابرآلود رہنے کی توقع ہے۔
لاہور سمیت پنجاب بھر میں شدید سردی کی لہر برقرار ہے۔ سرد ہوائیں چلنے سے ٹھنڈ میں مزید اضافہ ہو گیا ہے اور درجہ حرارت 5 ڈگری تک جا پہنچا ہے۔
محکمہ موسمیات کے مطابق اسلام آباد اور گرد و نواح میں موسم سرد اور خشک جب کہ دوپہر میں مطلع جزوی ابر آلود رہے گا۔ صبح اور رات کے اوقات میں دھند چھائی رہے گی۔
پنجاب کے بیشتر اضلاع میں موسم سرد اور خشک رہے گا اور دن کے وقت میں درجہ حرارت معمول سے کم رہے گا۔ مری، گلیات اور گرد و نواح میں موسم شدید سرد اور مطلع جزوی ابر آلود رہے گا۔ بہاولپور، ساہیوال، اوکاڑہ، قصور، لاہور اور سیالکوٹ میں دھند رہے گی۔
اس کے علاوہ نارووال، گوجرانوالہ، راولپنڈی، اٹک، جہلم، منگلا، فیصل آباد، جھنگ، سرگودھا، منڈی بہا الدین، ٹوبہ ٹیک سنگھ، خانیوال، ملتان، خان پور، رحیم یار خان، حافظ آباد، بھکر، لیہ، ڈیرہ غا زی خان اور گرد ونواح میں شدید دھند اور اسموگ چھائی رہے گی۔
بلوچستان کے بیشتر اضلاع میں موسم سرد اور خشک جب کہ شمالی اضلاع میں شدید سرد رہے گا۔ سندھ کے بیشتر اضلاع میں موسم سرد اور خشک رہے گا۔ جیکب آباد، حیدرآباد، موہن جو دڑو، سکھر، لاڑکانہ، دادو، گھوٹکی، خیر پور، کشمور اور پڈعیدن میں دھند اور اسموگ چھائے رہنے کا امکان ہے۔
کراچی میں صبح سویرے بارش، سردی بڑھ گئی
محکمہ موسمیات کے مطابق خیبرپختونخوا کے بیشتر اضلاع میں موسم سرد اور خشک رہے گا۔ بالائی اضلاع میں موسم شدید سرد اور مطلع جزوی ابرآلود رہے گا۔ چارسدہ، مردان، نوشہرہ، صوابی، پشاور، لکی مروت، بنوں، ڈیرہ اسماعیل خان اور گرد ونواح میں بھی دھند چھائے رہنے کا امکان ہے۔
کشمیر اور گلگت بلتستان میں موسم شدید سرد اور مطلع جزوی ابر آلود رہے گا جب کہ صبح کے اوقات میں بعض مقامات پر کُہر پڑنے کا امکان ہے۔