سعودی عرب کی وزارت سیاحت نے 2030 میں 150 ملین سیاحوں کی مملکت آمد کا ہدف مقرر کر دیا ہے۔
غیر ملکی میڈیا کے مطابق سعودی عرب کے وزیر سیاحت احمد الخطیب نے کہا ہے کہ سیاحت کا شعبہ قومی معیشت میں 750 ارب ریال تک کا ہدف مقرر کیے ہوئے ہے۔ بڑے منصوبوں کے ذریعے 2030 تک 150 ملین سیاح لانا چاہتے ہیں۔
ریئل اسٹیٹ کے فیوچر فورم میں خطاب کرتے ہوئے ان کا کہنا تھا کہ ماضی میں سیاحت کے حوالے سے مناسب قانون سازی نہیں ہوئی تھی تاہم سیاحت کے شعبے میں آئندہ منصوبے معیاری ہوں گے، فائیو سٹار ہوٹل کے حوالے سے متعدد معاہدے کیے گئے ہیں۔
وزیرسیاحت کا کہنا تھا 2023 کے دوران 2019 کے مقابلے میں 156 فیصد زیادہ غیر ملکی سیاح آئے۔ کورونا وبا کے منفی اثرات سے عالمی شرح سے کہیں زیادہ 88 فیصد تک نجات حاصل کر لی گئی۔ 2023 کے دوران مجموعی قومی پیداوار میں سیاحت کا حصہ 4.5 فیصد تک پہنچ گیا جب کہ ما سوائے تیل کے قومی پیداوار میں سیاحت کا حصہ 7 فیصد ہو گیا ہے۔
احمد الخطیب نے کہا کہ سیاحتی شعبے میں جو کامیابیاں ملی ہیں وہ اس بات کا ثبوت ہیں کہ سیاحت کے فروغ کے لیے جو اسکیمیں اور پروگرام بنائے تھے وہ درست سمت میں آگے بڑھ رہے ہیں۔
انہوں نے مزید کہا کہ مملکت میں وسیع پیمانے پر بڑے منصوبوں کے قیام کا مقصد سیاحت کے شعبے کو جدید خطوط پر استوار کرنا اور سیاحتی منصوبوں کے لیے سرمایہ لانا تھا۔ ہمارا مقصد پوری دنیا میں 1.7 ارب سیاحوں کے لیے جاری مسابقت میں حصہ لے کر زیادہ سے زیادہ سیاحوں کو مملکت کی طرف راغب کرنا ہے۔ غیر ملکی سیاح جو کچھ چاہتے ہیں وہ سب کچھ سعودی عرب میں موجود ہے۔